فايق عن رحيل ماكليش: «اللى بيحصل فى الزمالك مايرضيش ربنا»

هاجم الإعلامى إبراهيم فايق، صباح اليوم الثلاثاء، مجلس إدارة نادى الزمالك، برئاسة المستشار مرتضى منصور، بسبب طريقة رحيل الأسكتلندى أليكس ماكليش، المدير الفنى للأبيض.

وقال فايق، ببرنامجه "ملعب 9090"، على الراديو 9090: "معمعة فى الزمالك، والمتوقع دائما إن مفيش مدرب للزمالك بيقعد، حاجات غريبة بيعملها مجلس إدارة القلعة البيضاء، وماحدش بيتكلم، كل البرامج الرياضية عاملة نفسها مش واخدة بالها من اللى بيحصل فى الزمالك".

وتابع: "مفيش أى علاقة من اللى بيحصل بالزمالك مرتبط بالرياضة، كل 65 يوم بيتغير مدرب، طريقة رحيل المدرب حاجة صعبة قوى، يجى يقود التدريب يتقاله اقعد اتفرج أنت بس، اللى بيحصل ده غريب".

وأضاف: "منطق كرة القدم واضح وصريح وبيقول تغيير المدربين المستمر مش بيجيب حاجة ولا أى بطولة، واللى حصل السنة اللى فاتت كان حاجة غريبة، واللى بيحصل السنة دى مايرضيش ربنا، وطبعا كابتن محمد حلمى مش هيستمر كتير، وقبل دورى الأبطال الإفريقى الزمالك هجيب مدير فنى جديد".

برنامج "ملعب 9090"، يرأس تحريره الصحفى أحمد درويش، وإعداد محمد عمارة، ويذاع 4 مرات أسبوعيًا، من الأحد إلى الأربعاء فى تمام العاشرة صباحًا، ولمدة ساعة.