البث المباشر الراديو 9090
إسعاد يونس
تحدثت الإعلامية إسعاد يونس، فى برنامجها على الراديو 9090، عمن سرق ونش مترو الأنفاق.

وقال يونس فى "زى مابؤلك كده": "كلنا عارفين غنوة مين اللى سرق العمود، معروفة دى مش عايزة حكاية ولا حواديت عادل الفار، بس يا ترى بقى مين اللى سرق الونش؟ أيوه الونش الكبير ده اللى بنشوفه فى أى موقع إنشائى جديد".

الحدوتة يا سادة ببساطة ومن الأول كده.. إحنا شعب جبار والله، فى بداية التمانينات ومع زيادة السكان، الحكومة قعدت تفكر ثم تفكر ثم تفكر هتعمل إيه فى الزيادة السكانية دى، هتلاحق على الناس دى مواصلات إزاى وشوارعنا كل يوم بتضيق أكثر، وعدد العربيات بيكتر، والشوارع مش مستحملة البشر، هتستحمل العربيات إزاى!!

وأضافت الإعلامية: "كانت الفكرة موجودة فى الدرج من زماااان، وهى مترو الأنفاق، وبسرعة تم الاتفاق مع شركة فرنسية، لتنفيذ أول مترو أنفاق فى مصر، حاجة كده خيال أياميها، مترو بيمشى تحت الأرض، وكان مترو الأنفاق ده حدث أياميها، كل الأفلام اتكلمت عنه وفيه مشاهد اتصورت فيه، يعنى مثلا عندك عمنا حسين كمال صور فيه مشاهد من فيلمه قفص الحريم، أحمد زكى عمل مشاهد حلوة أوى فيه فى فيلم هيستيريا، أخونا محمد خان عمل كام مشهد فى المترو يتدرسوا بصراحة فى فيلم بنات وسط البلد، ما هو مترو الأنفاق بقى جزء من ثقافتنا الشعبية، يا راجل ده طلع فى قصايد الشعر، آه والنبى زى ما بقولك كده، أومال كان حدوتة وربنا مترو الأنفاق ده".

الناس كانت بتنزله تتفرج وتتفسح مش أكتر، كان خروجه يعنى، يعنى الناس يعنى تنزل وتروح وتتفسح وتقف طوابير منظمة وتذاكر من المكنة وانضباط ونظام، كان حاجة خيال.

وأكملت: "المدارس كانت بتحطه فى بروجرام الرحلات المدرسية، والعيال تنزل تتصور فى المحطة، والعربيات كانت آخر نضافة يعنى حاجة كده تستاهل التصوير، شبابيك سليمة، مراوح فى كل عربية، ممنوع التدخين، وكل دقيقتين ونص قطر، حاجة كانت جميلة فعلا".

وتسرد إسعاد قائلة: "أياام بقى.. يلا.. المهم يا سادة، الشركة الفرنساوية لما بدأت الشغل جابوا عدد من الأوناش الحديثة، بدأوا الحفر والتكسير والحاجات دى بمعدات حديثة جدا والشغل ابتدى، الكل بيسابق الزمن عن المترو يتم انجازه فى المعاد المحدد، وصحيت مصر، مصر كلها، على خبر فى كل الجرايد، خبر بيقول: "سرقة ونش مترو الأنفاق".. سرقنا الونش.. آه إحنا سرقنا الونش".

واختفى مترو الأنفاق من الجرايد خالص، والبلد كلها ركزت فى الونش اللى اتسرق، اتسرق إزاى، ومين سرقه، وراح فين، طب خباه فين يعنى؟؟

بس يا معلم.. الونش اتسرق واختفى ولحد النهاردة ماحدش يعرف الونش ده راح فين، ناس تقولك ده اتسيح واتباع حديد خردة، وناس تقولك لأ ده اتهرب بره مصر، اتهرب بره مصر إزاى، اسأل اتهرب بره مصر إزاى يا بابا ده ونش، يقولك دول المصريين جبابرة يعملوا أى حاجة.

راح الونش وفى عام 1987 تم افتتاح خط مترو الأنفاق الأول من رمسيس لحلوان، وبعدها بكام سنة افتتح الخط الثانى من رمسيس للمرج، وشوية بقى عندنا خط شبرا وخط الجامعة، وخط تالت ورابع جايين فى السكة.

واختتمت، عدت سنين كتير يا عمى، قربنا على 30 سنة، على افتتاح أول خط مترو أنفاق فى مصر، وماحدش لحد النهاردة عرف مين اللى سرق الونش، آه والله زى ما بقولك كده.



اقرأ ايضاً



آخر الأخبار

تعليقات القراء

تقع المسؤولية الأدبية والقانونية للتعليقات والمساهمات المنشورة على الموقع، على صاحبها، ولا تعبر بأى شكل من الأشكال عن رأى إدارة الموقع