كوكب زحل هو اللى لما يعدى على برج يسيب أثره عليه وبمعنى أدق "يعلم عليه"، وهو الحقيقة بين الكواكب شكله مميز كده تحسه حاطط حزام على وسطه، ربنا يجعل كلامى خفيف عليه ده المعلم الأكبر.
والمقال مش عشان أتكلم عن حظك إيه والا جاى لك فلوس أو لا، أو إنك هترشق فى حب أو زواج، أنا طبعا مقتنعة بحركة الكواكب وتأثيرها ومن المصدقين بإن أصحاب كل برج ليهم صفات متشابهة ومنهم برج الجدى، خاصة إنى محاطة بجديان كتير وممكن أعمل لكم عنهم دراسة، إنما ما قصدته من مقالى هو الناس المولودين فى أواخر ديسمبر واللى مولودين فى أول يناير.
طبعا هنا بقى نقف، بحس إن اللى التزموا وكتبوا أولادهم يوم 31 ديسمبر دول ناس عندهم ذمة أوى لأنهم خلاص خلوهم يتحسبوا على السنة فى التقويم الصينى بس النَّاس هتكبرّهم لأنها بتقول لهم أنتو من مواليد سنة كذا واللى مولودين بعدهم بيوم يتقال عليهم أصغر بسنة، وطبعا الأهالى اللى فكروا كده كتبوا أولادهم 1/1، وفيه ناس عملت ده عشان التاريخ شكله أحلى كده وتحس إن المولود ده حد واخد حقه من أول يوم فى السنة، ما فاتوش يوم، اللى لفت نظرى إن الفيسبوك بيقول لك على أعياد ميلاد الفريندز اللى معاك ، فجأة لقيت فى يوم واحد واتنين يناير عيد ميلاد نص الشعب اللى معايا، طبعا ببالغ هم أقل من النص شوية، ودى أكيد مش صدفة، ولمعرفتى بسيكولوجية الشعب المصرى اللى يقولك عشان المدارس تساءلت: كم واحد مكتوبين صح؟ الحكاية بالنسبة لى مش بالسن لأنى مقتنعة إنه مجرد رقم، عمرك وأنت سعيد غير عمرك وأنت مهموم، وعمرك اللى فى المراية غير عمرك اللى فى قلبك، ولكن فكرة الزمن والفرق أيّام وتأثيره استوقفنى.
بعيد عن الفلسفة والأبراج كل اللى فات كوم والهدايا كوم، لو أنت معظم أصحابك جدى فأنت محتاج ميزانية منفصلة، يلا مش خسارة فيهم دول ناس طيبين وجدعان والجدى صاحب صاحبه فعلا، هم صحيح عندهم كلام دبش وصحيح لما يزعلوا منك ينطحوك، بس حنينين أوى ويستاهلوا كل خير، كل سنة وهم طيبين.
آخر الأخبار
