مبتدا

كشفت الممثلة الشابة ملك أحمد زاهر تطورات حالتها الصحية، بعد إعلانها مؤخرا، إصابتها بمرض غامض.

ونشرت ملك أحمد زاهر عبر خاصية القصص القصيرة على إنستجرام تفاصيل حالتها الصحية، وكتبت: "أنا والله ما كنت متوقعة كل اللي حاصل ده، ولما قررت أشارك حالتي الصحية، كان لأني كنت مرعوبة جدا على نفسي، فكرة إن لا أنا ولا الدكاترة عارفين عندي إيه كانت مرعبة، وكنت محتاجة أوصلكم إن حياتي فيها الحلو وفيها الوحش.. وقلت في الستوري إن الموضوع مش الغرض منه القلق".

وواصلت ملك أحمد زاهر كلامها: "وأنا مش عايزة حد يقلق علي، أنا كويسة، وكده كده أحسن من غيري، وعندي يقين في ربنا إنه هيقومني بالسلامة، وإن شاء الله تكون حاجة بسيطة، كتبت الكلام ده من خضتي، مع إن دي مش طبيعتي إني أشارك الحاجات السلبية، عموما، أنا مش عارفة أقول إيه ولا إيه، من قلبي بشكر كل حد سأل علي ودعا لي، والله كل كلامكم وصلني، وآسفة لو ما رديتش على حد، وبشكر زمايلي وأساتذتي اللي كانوا بيسألوا علي كل يوم وما سابونيش لحظة، وكل صحابي وعيلتي اللي كانوا جنبي. أنا الحمد لله بقيت أحسن من الأول، وبطلت أروح المستشفى، والحمد لله إنها جت على قد كده".

وأضافت: "حتى لو الأيام اللي فاتت كانت صعبة، واللي عندي كان مخيف شوية وخضنا، بس برضه أنا كويسة، والحمد لله إنها عدت على خير، أكيد ربنا حماني من حاجة أكبر، وأهم حاجة إن عرف السبب بطل العجب، والحمد لله إننا عرفنا السبب".

وأخيرا كشفت ملك أحمد زاهر تفاصيل مرضها: "هو عبارة عن حساسية شديدة في الدم، والموضوع حساس شوية (critical)، بس أنا مطمنة، وبخف وبتحسن كل يوم الحمد لله. ما فيش حاجة خطيرة بإذن الله، وآسفة لو كنت أقلقتكم، بس والله ما كانش الغرض كده، شكرا من كل قلبي على الحب ده، أنا فعلا عرفت غلاوتي عندكم وعند كل اللي حواليا، بشكركم من قلبي".