مبتدا

عبر مشوار فنى قصير، كان محفوفًا بالتعب، والتحضير، والمثابرة.. استطاع أن يصل إلى قلب الجمهور والفنانين بألحانه القوية وموهبته المختلفة.. أثبت نجاحه مع كبار النجوم، وتعامل مع أشهر الأسماء.. حافظ على ثقة جمهوره، بخطواته وأعماله الفنية المتألقة.

فى ضيافة "مبتدا"، تحدث الملحن والفنان الشاب إسلام زكى عن حياته، ومفاجآته، وتعاونه مع الهضبة عمرو دياب، وكبار النجوم، وأجاب على كل ما يشغل جمهوره.

فى البداية تحدث إسلام عن دراسته، وأكد أنه تخرج من كلية "علوم الكومبيوتر"، حيث كان مصممًا للجرافيك، يقوم بتصميم ألعاب الـ"3D"، واستمر لمدة 4 سنوات بعد الدراسة فى العمل بهذا المجال.

وعن البداية واكتشاف الموهبة، قال إسلام: "كانت الموسيقى والغناء بالنسبة لى مش أكتر من "بيانو" موجود عندى فى البيت أعزف عليه وقت ما أحب، الناس كانت بتقولى صوتك حلو، وأنا كنت بتكسف جدًا، بس فى مرة غنيت فى حفلة بمناسبة السنة الجديدة والناس اكتشفت أن صوتى حلو، وفى الجامعة كنت بتجمع أنا وأصدقائى نغنى، ونعزف، وأسسنا "باند".

سألناه.. كيف اكتشفت أن لديك موهبة التلحين؟

كنت بعزف فى المدرسة، وبعد وقت وأنا بسمع الأغانى وبسأل إزاى الملحن بيجمع الكلام ويعمل اللحن، بدأت أعمل ألحان واشتغل، واحنا بتكون جوانا موهبة ومش عارفين أنها موجودة، وحاجة مينفعش تتعلم وتتدرس مثل "الرسم" موهبة من عند ربنا".

كلمنا عن قرار ترك "الجرافيك" والتصميم؟

كان قرارًا صعبًا إن أنا أسيب الشركة اللى شغال فيها وأغير الكارير بتاعى، وأهلى كانو مصدومين من القرار، ولكن والدتى كانت متفقة معايا فى القرار وقالت "أنا شايفاك حاجة كبيرة"، فى البداية كنت خايف اشتغل فى الألحان، والمطرب ينجح، والناس متعرفنيس "كأنى ببيع أولادى".

كيف بدأت السعى وراء حلمك؟

كنت بشوف عناوين الأستوديو على "سى دى" المطربين، وأحاول أقابل حد اعرض عليه الألحان عشان أعرف أنا موهوب ولا لأ، وتعرفت على الدكتور هيثم الفيل، وكان عمل أغنية "عرفت معنى الحب" للفنان سامو زين فى فيلم، سمع ألحانى وعرفنى بسامو زين وعجبه الشغل بالفعل، وكان سامو شغال فى الوقت ده فى ألبومه "ديمًا"، سامو أخد رقمى من دكتور هيثم وكلمنى، وافتكرتها اشتغالة وقفلت فى وشه، وبعدها كلمته قالى أنا مبسوط بيك جدًا، وأنت موهوب، وخدنى معاه للأستاذ محسن جابر فى "مزيكا"، كان عندى 17 سنة، وشكلى صغير جدًا، عملت أغنية "لأنك معايا"، وكنت شغال فى المبيعات بشركة بالساحل الشمالى فى الوقت ده، وكنت مستنى البوسترات وأشوف اسمى، ومحدش كان يعرف أنى أشتغلت بالفعل، كانت أول مرة يتكتب ألحان: إسلام زكى. كمان الفنان عمرو مصطفى كان من فريق عمل ألبوم سامو زين، وعلاقتنا كانت قوية جدًا، وقالى مبروك وفرحلى جدًا.

بعد ما الناس عرفتنى، مطربين كتير طلبوا اشتغل معاهم وأنا رفضت بسبب رفضهم لموهبتى فى البداية وكان فى إهانة مش مجرد رفض فقط.

وكمان الفنان رامى جمال، بارك لى وقالى "انت موهوب وهتوصل".

ماذا عن حلمك فى الوصول إلى عمرو دياب؟

كان فى حفلة لعمرو دياب لألبوم "وياه" فى المكان اللى كنت بشتغل فيه فى الساحل الشمالى، ومديرى رفض أنى أحضر الحفلة، ونزلت من وراه وطلعت على الإستيدج، وقفت عند الفرقة وعمرو دياب بيغنى، كنت بحلم أنى اشتغل معاه، ولما شفت عدد الجمهور والمشهد من فوق، ونزلنى "البودى جارد"، قلت أنا مستحيل أوصل للمكان دا، واكتأبت جدًا، وكسَّرت الأورج، وقررت بعدها أنى أستمر فى شغلى، والألحان تكون حاجة جانبية، ولكن العند رجعنى أفكر فى الموضوع تانى.

ماذا عن رد فعل سامو زين بعد نجاحك؟

فى 2010 كلمنى سامو تانى، كانت الناس بدأت تعرفنى، وكنت أحضر حفلات مع سامو زين، ويقدمنى للناس، حسيت بثقة كبيرة فى نفسى، وكل ميظهر فى برنامج، كان لازم يقول إسلام ملحن موهوب، وعلاقتنا كانت مش مجرد شغل بس، وهو من أقرب الناس لى فى الوسط، وقالى أنت هتوزع أغانى كمان مش ألحان بس، عملت "حلمت بيكى" "وأنا مستعد" و"فارس أحلامك" و"هتعرف قيمتى"، وحسيت أنهم كتير أوى، واشترى لى سامو سماعتين وكمبيوتر جديد، وشجعنى جدًا على الشغل، وساعدنى أكتر مهندس الصوت هانى محروس، وأغنية "هتعرف قيمتى" نزلت سينجل بعد الألبوم.

وماذا بعد التعاون مع سامو؟

فى فترة ثورة 25 يناير الشغل وقف تمامًا، وكان فى هدوء مش طبيعى، واشتغلت مع بهاء الدين محمد، وخالد تاج الدين عرفنى على الفنانة اللبنانية كارول سماحة، وكانت محطة مهمة جدًا فى حياتى فى أغنية "مبنتحملش بعض".

حدثنا عن تعاونك مع تامر حسنى؟

تامر حسنى كان بيحضر الألبوم الجديد فى نفس الفترة، وعملت أغنية "حد شبهه" سمعها وعجبته، وفى 2012 بعد الثورة وقف جنبى فى الفترة دى أستاذ حمادة إسماعيل، وهو صديق مقرب جدًا للفنان عمرو دياب، سمعته أغنية "فوق من اللى أنت فيه" وعجبته جدًا وكانت أكتر فترة ركزت فيها، وقالى إنه بعتها لعمرو وعجبته، واليوم دا منمتش من التوتر والرعب، ضحك على وقالى إن عمرو مش هياخد الأغنية فى الألبوم، بعدها مدير أعمال عمرو دياب كلمنى وقالى هقابلك عشان نخلص ورق الأغنية، وهى من كلمات تامر حسين، وكان حلمى ألحن أغنية من كلماته.

وفى 2013 تم طرح أغانى كارول، وتامر، والهضبة، بعدها "حياتى تغيرت 180 درجة"، وأول مرة سمعت الأغنية بصوت عمرو كان حاجة متتوصفش، مصدقتش أن عمرو دياب بيكلمنى وبيقول اسمى. كان فخرًا لى جدًا.

ماذا عن رد فعل أصدقائك الفنانين بعد التعاون مع عمرو دياب؟

فى ناس فرحتلى وناس مفرحتش، فى ناس كتير قالت عمرو دياب بيوقع نفسه، وجمهور عمرو دياب فرحلى، واحتفلت معاهم بالألبوم فى "فيرجن ميجا ستور" وكانت خطوة مهمة جدًا.

وماذا عن رد فعل عمرو دياب على الأغنية بعد نجاحها؟

كلمنى الهضبة أول مرة فى التليفون وبارك لى، وفعلًا هو أكتر حد زوق وبيحترم الناس جدًا ويقدرهم، وقال الألبوم نجح والأغنية، وأنت ناجح وألف مبروك، متسمعش كلام حد واستمر، واشتغل، وانجح.

كلمنا عن أول حفلة لألبوم "الليلة"

كانت فى "موسى كوست"، كان إحساس تانى وأنا لأول مرة مش من الجمهور، وكان معايا فريق عمل الألبوم، والفنان كريم محسن، والناس فرحولى من قلبهم، وفى الحفلة عمرو دياب قالنا نطلع على "الإستدج" وقدمنا للناس، وكان أول واحد تامر حسين، وقال اسمى بعدها، وقال للناس أنا أول مرة أشوفه، واتكلمنا فى التليفون قبل كده واشتغلت أغنية "فوق من اللى انت فيه" وقال أول كلمة فيها وسابنى أكمل وكان رعب بالنسبة لى.

وعن أعمال 2014؟

كان فى صداقة بينى وبين تامر عاشور، وهو موهوب ومحترم جدًا وبتباهى أنى اشتغلت معاه، سمعته أغنية "أنا راجع" وعجبته جدًا، وحضرت حفلة معاه وقدمنى للجمهور، وبزوقه قال "إسلام أشتغل مع الهضبة ومعايا".

هل تعاملت مع فنانات غير كارول سماحة؟

كان فى فترة يعرض برنامج "شكلك مش غريب" لهيفاء وهبى على فضائية "إم بى سى" كنت عامل أغنية اسمها "فرحانة" كلمات تامر حسين، عجبت هيفاء جدًا ووافقوا عليها وخلصتها فى 3 أيام، وتمت إذاعتها فى "البرايم" وكسرت الدنيا فى لبنان، وأصبحت رقم 1 فى لبنان لمدة 3 أشهر.

وماذا عن ثلاثية ألبوم عمرو دياب 2014 "شفت الأيام"؟

عملت 3 أغانى فى الألبوم والجمهور أطلق عليهم "الثلاثية"، "أيوه أتغيرت"، "أنا مش أنانى"، و"ساعة الفراق".

ما رأيك فى موضوع تركيب الألحان على الكلمات؟

مفيش قاعدة أن الكلام يكون قبل اللحن أو العكس، "فوق من اللى أنت فيه" كان لحن فقط، وتامر حسين كتب عليه، "ساعة الفراق "وأنا مش أنانى" و"أيوه أتغيرت" تامر بعتلى الكلام وأنا عملت اللحن.

هل يطلب منك عمرو دياب عمل ألحان فيها شكل قديم؟

مش بيطلب كدة، واحنا بنشتغل بننسا إننا بنشتغل لعمرو دياب عشان نطلع حاجة مختلفة، بنشتغل ديمًا على الجديد.

هل هناك تعاون مع الهضبة فى الألبوم المقبل؟

هناك تعاون مع الهضبة فى الألبوم المقبل دون تحديد عدد الأغانى، وأنا بحب عمرو دياب جدًا، وتفكيرى مش فى عدد الأغانى ولكن الأهم هو نجاح الألبوم.

ما هى أقرب أغنية إليك؟

"أنا مش أنانى" طلعت من جوايا جدًا واشتغلت فيها كتير لحد ما وصلت لإنى راضى عنها.

هل رفضت العمل مع أحد المطربين؟

أكيد فى ناس رفضت اشتغل معاهم عشان بخاف على اسمى، بيكون صوته مش مناسبنى، أو حاجة فيها رقص وملابس معينة، مينفعش أقلل من نفسى عشان فلوس أو شهرة.

هل تواجه انتقادات؟

بواجه انتقادات فى حياتى الشخصية، مش فى المزيكا أو الأغانى.

هل تعاونت مع نجوم أرب آيدول أو ستار أكاديمى؟

عملت ألحان لنجمة ستار أكاديمى شاهيناز ضياء والأغنية حققت نجاح كبير ووصل عدد مشاهدتها على اليوتيوب أكثر من مليون مشاهد، وهناك مفاجأة قريبًا، وهى أغنية مع فنانة من الأوبرا، وهناك تعاون آخر مع الفنان تامر عاشور فى الألبوم المقبل مع تامر حسين وعادل حقى، وتعاون آخر مع الفنانة كارول سماحة مختلف وجديد.