مبتدا

نفت المطربة شذى، ما تردد عن وجود خلاف بينها وبين المطرب الشعبى عبد الباسط حمودة، بعد ظهورهما معا مساء أمس، فى برنامج "الحياة حلوة" مع رزان المغربى.

شذى كتبت على صفحتها الخاصة على موقع التواصل الاجتماعى "فيسبوك": "صباح الخير، الحمد لله جالى تعليقات كثيرة حلوة على حلقة إمبارح مع رزان مغربى على قناة الحياة، بس صحيت لقيت الدنيا مقلوبة ومانشيتات صحفية إن الفنان عبد الباسط حمودة أحرجنى وعناوين من النوع ده".

وواصلت كلامها: "عبد الباسط حمودة صوته قوى وحلو طبعا بس هو بيقدم نوع فن بعيد عن النوعية اللى أنا بقدمها خالص شكلا ومضمونا وبالنسبة لثقافته إن لازم المطرب يغنى فى الشارع طبعا ده رأيه ويحترم بس أنا شايفة إن الحمد لله ظروفى وطبيعة نشأتى وشكل حياتى وإنى بنت مكنش ينفع أغنى فى أماكن كده، وإنى وظفت موهبتى اللى ربنا إدهالى بإنى اتدربت فى الأوبرا مع دكتور سليم سحاب ودكتورة رتيبة الحفنى".

وختمت شذى تغريدتها: "يعنى علشان مطولش عليكوا ثقافة مختلفة خالص عن ثقافة غنا الشوارع ومش تقليل من أى مطرب غنى شعبى أو غنى فى الشوارع بس الحمد لله بالنسبالى نشأتى وظروفى خدمونى والحمد لله إنى مكنتش محتاجة أغنى فى أفراح شعبى أو شوارع وكان عندى قنوات أكتر ثقلا للانتشار... والراجل فنان واتكلم بفطرته وعلى سجيته وأنا بحب صوتوا. بس ثقافته كده إن الفنان اللى بجد لازم يكون غنى فى الشارع طيب هنعملوا ايه ؟؟؟ يعنى الموضوع كلوا اختلاف ثقافات مش أكتر".