عبدالظاهر: «كوبر مش فاشل.. والمنتخب محتاج حرامى»
قال عبدالظاهر السقا، نجم منتخب مصر السابق، إن هيكتور كوبر، المدير الفنى للفراعنة، نجح فيما فشل فيه البعض فى الوصول لأمم إفريقيا، بعد غياب 3 مرات، بجانب ضربة البداية فى تصفيات كأس العالم، أمام الكونغو، والفوز بهدفين مقابل وحيد.
وأوضح السقا، للإعلامى إبراهيم فايق، ببرنامجه "ملعب 9090"، على إذاعة الراديو 9090: "مصر كلها محتاجة تفرح، والكرة بتساعد جدا على لم شمل الناس، الحمد لله، الهدف اللى إحنا رايحين له اتحقق، وده شىء إدى للناس أمل، وبيكون طموح تانى وكمان تطلعات تانية، وبالنسبة للجهاز الفنى بيديه ثقة وهدوء، وكمان اللاعبين هيديهم ثقة كبيرة فى نفسهم، لأن الجيل ده فجأة لقى نفسه فى منتخب مصر".
وتابع: "مصر بانية أملها على لاعب سنه 24 عاما، محمد صلاح، لسه جسم المنتخب لم يكتمل، وأكتر واحد فى المنتخب لعب 40 مباراة دولية بالكتير، باستثناء الحضرى وعبدالشافى، لسه اللاعبين عضمة طرية، والعضمة لسه منشفتش".
وأضاف نجم الفراعنة: "95 % من منتخب مصر ملعبش بطولات إفريقية، مثلا عبدالله السعيد لم يلعب بطولات إفريقية، محمد صلاح ملعبش بطولات إفريقية، كل الجيل ده ملعبش بطولات إفريقية، اللى بتدى تراكم خبرات، والخبرات كلها متمثلة فى عصام الحضرى حارس المرمى، وكمان محمد عبدالشافى، لكن عبدالشافى طيب، محدش صايع فى الملعب أو حرامى ماتشات، وحرامى ده معناه، فى عز ما تكون فى شدة زنقتك تخطف جول".
وتابع: "عجبنى جدا مستر كوبر، وبصمته واضحة، بعد البطولة الإفريقية هنشوف منتخب محترم ومظبوط، ودايما بيبتدى التغير بعد الدقيقة 65 من اللعب، ودى حاجة كويسة جدا، الراجل ده الوحيد فى مصر اللى مش بيجى بالضغوط، الراجل ده ناجح، وبالأرقام وصل لأمم إفريقيا بعد غياب 3 مرات، وتصفيات كأس العالم ماشى فيها، يبقى متقدرش تقول عليه فاشل، فيه أخطاء فنية موجودة، لكن مش فاشل".
برنامج "ملعب 9090"، يرأس تحريره الصحفى أحمد درويش، وإعداد محمد عمارة، ويذاع من الأحد إلى الأربعاء فى تمام العاشرة صباحًا.