الاتحاد السكندرى

شن الدكتور محمود مشالى، رئيس نادى الاتحاد السكندرى، هجوما عنيفا على حكم مباراة فريقه والأهلى، إبراهيم نور الدين، فى اللقاء الذى جمع بين الفريقين فى مسابقة الدورى العام، وانتهت بالتعادل الإيجابى 2-2.

وقال مشالى، للإعلامى إبراهيم فايق، ببرنامجه "ملعب 9090"، على إذاعة الراديو 9090: "أنا سعيد بمستوى الفرقتين، أنا شوفت مستوى الأهلى إمبارح والصراحة الشكل ده كان غايب من الأهلى بقاله فترة، الماتش كان فيه كورة، وده بيصب لصالح المنتخب".

وتابع: "فى الاتحاد السكندرى الولاد والجهاز الفنى عندهم قناعة أنهم فنيا كويسين، وبغض النظر عن النادى لازم يحققوا نتيجة إيجابية، وده جديد على الاتحاد، وإن شاء الله نكمل على كده، المجموعة كلها كويسة، وفى الأساس هى فرقة جماعية، مع مدير فنى محترم".

وأضاف: "الإسكندرية إمبارح كانت خضرا، إحنا فريق كبير، وفيه جماهير عريضة ورا الفريق".

وتابع رئيس النادى: "محبش أتكلم عن التحكيم، لكن طبعا مش راضى عنه، والأهلى مش محتاج حد يساعده، وطبعا كان فيه مساعدة من إبراهيم نور الدين للأهلى، إحنا مش طالبين ناخد أكتر من حقنا".

برنامج "ملعب 9090"، يرأس تحريره الصحفى أحمد درويش، وإعداد محمد عمارة، ويذاع من الأحد إلى الأربعاء فى تمام العاشرة صباحًا.