مبتدا

تحدثت الإعلامية إسعاد يونس فى برنامجها "زى مبؤلك كده"، على الراديو 9090، اليوم، عن البعثات الدراسية.

وقالت إسعاد: "محمد على باشا لما قرر يبنى مصر الحديثة كان هدفه دايما دولة قوية، دولة تقدر تقف قدام أى قوة مهما كانت عظمى، تقدر تكون رأس برأس قصاد أمم أوروبا عموما وإسطنبول خصوصًا، فشاف أن بناء البشر مهم ويمكن أهم بكتير من بناء الحجر فاعتمد سياسة الاستقدام والإرسال، اللى منعرفش نعمله كان يبعت يجيب أحسن واحد يعمله فى بلده يجى مصر ويعمله ويعلم المصريين يتعمل إزاى".

وأضافت: "وبعت طلاب وحرفيين لأوروبا يتعلموا ويتنوروا ويرجعوا لمصر وينقلوا كل اللى اتعلمواه لأولاد بلادهم، السياسة اللى اتعرفت بعد كدة بمسمى البعثات الدراسية، والبعثات الدراسية المنظمة دى سبيل حقيقى لتقدم الأمم، من أكتر المؤمنين بأهمية البعثات الدراسية وأهمية دورها في نهضة الدولة كان مين؟ كان الخديوى إسماعيل اللى فى زمنه مش بس تضاعفت أعداد المبعوثين للخارج لا كمان ظهر تأثير العائدين من الخارج بعلمهم وتنويرهم على البلد، اللى هى اتحولت فعلا وقتها، لدولة عصرية تضاهى تألقها وجمالها وتمدنها أوروبا نفسها".

وأضحت: "والحقيقة ده من ضمن المحاور اللى الدولة متبنياها حاليا فى الارتقاء بمستوى المتعلمين بمصر، ومصر الخير زى عادتها بالمساهمة بكل ما هو نافع لبناء الإنسان كان ليها السبق فى تعاونها فى برامج الابتعاث والمنح الدراسية للخارج، وكنا اتكلمنا قبل كده فى الموضوع ده واستعرضنا منحة الصين الخاصة بمصر الخير، بمناسبة منحة الصين بقى، عايزة أكلمكوا عن واحد من المتميزين جدا بمنحة الصين الخاصة بمصر الخير دى، أحب أنا النماذج الحلوة دى".

واستكملت: "الطالب المشرف ده اسمه عبدالله عزائم طالب بمنحة الصين الخاصة بمصر الخير وتخصصه ميكاترونكس، الطالب عبدالله عزائم ده من الطلبة المكرمين من المعهد اللى بيدرس فيه بسبب تفوقه العلمى بالإضافة كمان أن جميع أساتذته يشهدوله بالدماثة والأخلاق العالية جدا، عبدالله عزائم أخد موافقة من مكان دراسته فى الصين أنه يحضر المؤتمر الدولى للشباب اللى انعقد فى شرم الشيخ الفترة اللى فاتت، وكان تحت رعاية سيادة الرئيس، وفعلا قدر يحصل عبدالله على الموافقة وكمان يوصله من مصر دعوة حضور وتذكرة سفر كمان، ولما أساتذته يعرفوا أنه رايح مؤتمر بالحجم ده والأهمية دى يقدروا جدا ده للطالب لأنه هيرجع عليه بالفايدة وكمان يقررا يأجلوا أى امتحانات تكون فى وقت اشتراك الطالب فى المؤتمر".

وتابعت: "حكاية عبدالله وحكايات تانية كتير للطلبة اللى بيشرفوا اسم مصر فى الدول اللى بيرحولها كطلبة لدرجة أن أساتذتهم تشيد بيهم مش بس كدة دول كمان اختاروه مع اتنين طلاب صنينين متفوقين يمثلوا المعهد فى مسابقة علمية كبيرة على مستوى الصين وده بيأكد على فكرة حسن الاختيار سواء من مصر الخير أو من معهد الصين، فتحية كبيرة للطالب وتحية كبيرة لمصر الخير والقائمين عليها اللى قدروا يدوا فرصة حقيقية لطلبة مستحقين للمساعدة للوصول للمستوى الفنى والعلمى والتقنى اللى هما يستهلوا نتيجة لتفوقهم وسعيهم للأفضل دايما ودعوة لكل اللى نفسه يدرس علم أو تكنولوجيا جديدة فى بدل الطريق ألف، اسعى واتحرك وأنت هتلاقى اللى يساعدك وياخد بأيدك بس أنت أسعى، مفيس حاجة هتجيلك وأنت قاعد فى مكانك، والله العظيم زى ما بقولك كدة، قوم".