مبتدا

تحدثت الإعلامية إسعاد يونس فى برنامجها "زى مبؤلك كده"، على الراديو 9090، اليوم، عن التعليم المجتمعى.

وقالت إسعاد: "صباح الفل، مرة كان عندى شغل، اضطريت بسببه أنى أروح مكان هناك، هناك خاص، جوه الصحراء بكذا كيلو متر، بعد ما مشينا فى طريق مفيهوش أى كان حى من أى نوع، لقينا مكان فيه بشر عايشين، يمكن دى حاجة عابرة، ممكن تشوفها وتنساها، إما الحقيقة بسرح فى الناس اللى زى دول فى كذا مكان زى كدة فى مصر منعرفش عنه حاجة، ومنتخيلش حتى وجوده، مش بس فى الصحراء لكن فى أماكن كتيرة أوى لأسباب مختلفة".

وأضافت: "الناس دول بيعيشوا إزاى؟ بياكلوا إيه؟ بيشربوا إيه؟ وبعدين قولت لنفسى ما هما أكيد بياكلوا ويشربوا وعندهم حل ما وإلا مش هيبقوا موجودين هنا، لكن السؤال المفروض بقى، بيتعلموا إزاى؟، وبيتعلموا إيه؟، التعليم من أساسيات الحياة، وأكيد مش هنيجى سنة 2017 ونتكلم عن أهمية التعليم يعنى، إحنا بنقول الكلام ده من أيام فحت البحر، وأكيد كلنا فاهمين الكلام ده، لكن فى مجتمعات بعيدة عن العين، ممكن جدا ميلقوش وسيلة لتعليم عيالهم فبيطلعوا كدة من غير أدنى حظ من المعرفة، الناس دول البعيدة عن العين، مش شرط يكون السبب ورا ده أنهم بعيد فى المكان فى بيئات كتير ظروفها جت كدة معندهاش فرصة فى التعليم النظامى المتاح، طب نعمل ايه؟، هنا بيكون دور المجتمع المدنى لكن موضوع زى ده لا يمكن يتم بدون رصد مشروع خاص وميزانية خاصة، واحتراف فى حاجات كتيرة تخص النوع ده من الأعمال وده بالظبط اللى بتعمله مؤسسة مصر الخير فى مشروعها للتعليم المجتمعى".

وأوضحت: "التعليم المجتمعى، ده نوع من التعليم المرن جدا، مرن بمعنى أنه يراعى ظروف كتير فبيخفف حاجات من اللى بيلتزم بيها التعليم النظامى، فبيشجع الولاد والبنات خصوصًا البنات أنهم يروحوا يتعلموا، زى إيه؟ زى الالتزام بزى معين، زى مواعيد الدراسة خصوصا مجتمع زراعى مثلا والأولاد بيساعدوا أهاليهم، زى الالتزام بأن الدراسة تبقى سنة بسنة، يعنى الدراسة فى النظام ده بتبقى بحسب استيعاب الطالب وسنه، يعنى الأكبر من السن العادى نجمع سنتين فى سنة واحدة، مش 6 سنين ابتدائى و3 إعدادى وهكذا، غير بقى الظروف".

وتابعت: "النوع ده من التعليم بيعتمد على طرق غير تقليدية تزود قدرة الطالب على أنه يعلم نفسه بنفسه فى حال مكملش حتى فى المدرسة دى لأى سبب من الأسباب، حصيلة المشروع ده واللى تم حسابه فعلا لحد دلوقتى كان أكتر بألف مدرسة بشوية كدة، بتعلم فوق الـ27 ألف طالب فى محافظات الصعيد وكفر الشيخ ومطروح غير التنمية المهنية بما يزيد عن 2000 مدرس".

واستكملت: "حصلت كمان زيادة فى حصيلة التبرعات فى المشروع ده، كمان قدم المشروع خدمات تعليمية لأمكان زى الشلودى والأعرا دول أماكن جوه الصحراء بعمق 50 كيلو، ومش واحة من الواحات المعروفة على فكرة، بنبسط أوى بالحاجات اللى على الأرض وكنت بكره الأرقام زمان جدا لكن الأرقام دى مش مجرد أرقام، دى بتعنى أطفال شيفاهم قدام عينى دلوقتى رايحين جاين على المدرسة بيتعلموا وبستفيدوا وبيجهزوا عشان يفيدونا كلنا".