مبتدا

تحدثت الإعلامية إسعاد يونس فى حلقة اليوم من برنامج "زى مبؤلك كده" المذاع على "الراديو 9090" عن "اليوم العالمى للتضامن الإنسانى".

وقالت يونس "لما العالم بيحدد يوم معين، ويقول ده اليوم العالمى لكذا، مش بيبقى الغرض منه ترفيهى ولا فكاهى، وأكيد مش عمل كوميكسات وصور ساخرة عن الحاجة دى، آه والله زى مبؤلك كده، فكرة اليوم العالمى دى جاية من حاجة مهمه قوى، وهى إن العالم زحمة، والدنيا تلاهى، والإنسان نساى، ربنا خلقه كده، بينسى، ودى نعمة كبيرة من نعمه عز وجل.

وتابعت: "علشان كده فكرة اليوم العالمى دى عاملة زى المنبه، وبيفكرنا بمعانى ممكن تكون راحت فى الزحمة، أو خلينا نقول راح الاعتناء بيها حتى وهى موجودة، مثلا النهارده 18 ديسمبر، اليوم العالمى للتضامن، اللى هو إيه ده التضامن يا ولاد، اللى هو سيادتك إنه الشعوب والهيئات والمؤسسات وكلنا كلنا كده، نذكر بعض بشوية حاجات تبدو بديهية، بس على الأرض هى مش كده، زى إيه، زى أنه كلنا واحد مثلا، كل البشرية واحد، متنوعين صحيح فى الجنسية، فى اللون، فى المعتقدات، فى حاجات كتير، لكن كلنا فى النهاية واحد، وميصحش الأسرة البشرية تتساهل مع وجود كل هذا الكم من الفقر والاحتياج، والعوز، والمشكلات والكوارث، لازم يبقى فيه جهود لتقليل كل ده، على قد ما نقدر".

وتابعت يونس "طب وده يتعمل إزاى فى الواقع، بعيداً يعنى عن الكلام.. فى اتجاهين، الأول أنه تنظم الفعاليات اللى بتقوم على مناقشة الموضوع ده وعمل الخطط لكده بين المؤسسات وبعضها، التانى، تشجيع المبادرات، كل المبادرات اللى هى حاطة قدامها الهدف ده، تقليل المعاناة عن البشر على قد ما نقدر".

وأضافت يونس "من المؤسسات اللى واخده الموضوع ده بجد، مؤسسة مصر الخير، مصر الخير فى اليوم العالمى للتضامن، بتشتغل على تنمية التضامن والتعاون، بين الثلاث قطاعات المسؤولة عن تقديم الخدمات، كل الخدمات، لكل الناس، الحكومة، والقطاع الخاص، والمجتمع المدنى، التعاون اللى كل ما يبقى أسهل وأوثق بيوفر فرص كتير لمساعدة المحتاجين، يعنى مثلا عمليات زراعة القوقعة للأطفال، دى عملية مكلفة جدًا، والدولة بتعملها لأطفال كتير على نفقتها، لكن قائمة الانتظار بتبقى طويلة، وفى فرص كتير بتروح نتيجة إن الورق والإداريات المطلوبين من الأهالى بتاعة الأطفال كتيرة، فلما حصل التعاون بين الجهات المختلفة دى، بمبادرة ورعاية مصر الخير، ده بقى يخلى فى نظام يعتمد على شبكة إليكترونية، ويبقى الموضوع أسهل على كل المستويات، ويساعد أنه دور الأطفال ييجى أسرع".

وتابعت يونس "على فكرة، مع أنه بالشكل ده العمليات هتزيد، فالبتالى التكلفة هتزيد، لما نسهل الإجراءات، لكن من ناحية تانية، توفير الوقت والجهد، وكمية الحاجات المطلوبة، هيوفر كتير برضو، يعنى اللى هيزيد من هنا، هنوفره من هناك، والأمور كده هتبقى موزونه، ده مجرد مثال للمبادرات والاتفاقيات اللى بتتبناها المؤسسة على مدار السنة طبعا، لكن بييجى اليوم العالمى للتضامن بقى، فرصة للكلام على كل المبادرات دى، وتوفيرها، وتنظيم مؤتمرات علشان نناقش أهميتها، نجدد التفكير فى حاجات جديدة، مش كده ولا إيه، كل ده، ياه، كل ده، أيوه، كل ده وأكتر من ده كمان، اليوم العالمى لكذا دى، مش حاجة سهلة ولا بسيطة، ممكن نهزر آه، بس ضرورى بقى ده يكون بعد ما نخدها على محمل الجد، بجد زى ما بقولكم كده."