مبتدا

تحدثت الإعلامية إسعاد يونس فى حلقة اليوم من برنامج "زى مبؤلك كده" المذاع على "الراديو9090" عن "ابن السبيل".

وقالت يونس "مصر بلدنا كبيرة، كبيرة، مش بس كبيرة القامة والقيمة، والمكانة، ولا عدد السكان، لكن كمان فى كبيرة فى المساحة والمسافة، بين مدنها المختلفة، من شمالها لجنوبها، من بحريها لقبليها، آه والله زى مبؤلك كده".

وتابعت: "لهذا أوقات كتير بتحصل مشكلات، لما الواحد يكون فى مدينة، وتضطره الظروف يروح مدينة تانية، خصوصاً لو مش هيعيش فيها بشكل دائم، هو بس مطلوب منه يعمل حاجة ويرجع بلده تانى، زى إيه، زى مثلا ولادنا وبناتنا فى الجامعة، اللى يجيله مثلا تنسيقه فى كلية بعيدة عن بيت أهله، اللى هيروح جامعة القاهرة وهو من الصعيد، أو جامعة المنوفية وهو من كفر الشيخ، أو جامعة جنوب الوادى وهو فى حلايب وشلاتين، وهكذا يعنى.. وكمان زى المريض، اللى مش بيلاقى علاج فى مدينته أو قريته، فيسافر بلاد وبلاد، وأهله يسافروا معاه، طيب المريض ده هتستقبله المستشفى، إنما أهله يعيشوا فين فى الحته البعيده دى، بتحصل حاجات كتير زى دى، ومينفعش نعتمد على التصرفات الشخصية، حتى لو كنا كمصريين أهل كرم وجدعنة، لكن دى، حاجة بقت كتير، لدرجة أنها بقت محتاجة تركيز خاص شوية، ومشروع يستهدف الحالات اللى زى دى، وينظمها ويرتبها، ويكون عنده وعى بكل الحالات اللى تستدعى توفير أماكن الإقامة، وأماكن الإقامة دى برضو تبقى جاهزة، وتبقى تحت إشراف الجهات المعنية، علشان ميبقاش فيه فوضى، والمحتاج فعلا هو اللى هيستفيد، مشروع كده زى "ابن السبيل" اللى عملاه مؤسسة مصر الخير، فى أماكن كتير جوه مصر وبراها".

وقالت يونس: "أولا ابن السبيل ده هو مصرف شرعى من مصارف الزكاة الثمانية، وبيتم تخصيصه للى يبعد عن بيته مسافة أكثر من 85 كيلو متر، حلو الكلام، ثانياً بالنسبة للطلاب، مكان إقامتهم بيكون فى المدن الجامعية، بس المدن دى ساعات كتير، مش بتقدر تستوعب كل الطلاب، طبيعى يعنى، علشان نقص التجهيزات زى سرير، دولاب، كرسى، الحاجات البسيطة دى للطالب لما بتكون لأعداد كتيرة قوى، بتكلف كتير قوى".

وأضافت "مشروع ابن السبيل ده، دعم التجهيزات دى لـ3900 طالب وطالبة فى محافظات الجمهورية خلال السنة دى بس اللى هى 2017، زى جنوب الوادى والمنيا وبنى سويف وكفر الشيخ والقاهرة وقرية السالمية كمان، وبيستعد علشان يكبر العدد المستهدف ده السنين الجاية، وكمان بيعملولهم أنشطة طلابية جوه المدن الجامعية، كمان ساهم فى أنه يعمل بيت الطالبات فى المنوفية، علشان يستوعب بناتنا اللى بيدرسوا هناك، واللى مش قادرين يلاقولهم مكان فى المدن الجامعية، وبيت الطالبات ده، بتديروا الجامعة نفسها وإشراف من (مصر الخير)، اللى هى بتخلى طالباتنا يتميزوا دايما فى دراستهم، علشان نضمن إنه ميفرقش حاجة عن المدن الجامعية، خصوصاً فى رعاية البنات.

كمان عندنا بيت طالبات فى بنى سويف، بنقوم برعاية الطالبات بشكل كامل، وبنوفر احتياجات كتير لبناتنا، كمان يا سيدى عندك طلاب حلايب وشلاتين، فى جامعة جنوب الوادى مثلا وأسوان، دول ليهم اهتمام خاص، ودار الوافدين للطلبة اللى بيدرسوا فى الأزهر من بره مصر، وملهومش مكان فى مدينة البعوث، وتكوين قاعدة شبابية جوة كل المدن الجامعية، كمان فى كتير من المستشفيات، مبتقدرش توفر مكان إقامة للمريض وأهله، يعنى إيه، يعنى مثلا بعد ما ياخد جلسة العلاج الكيماوى أو الإشعاعى، أو يعمل عملية مثلا، هيروح فين بعد كده، فمن خلال برنامج "ابن السبيل" قدروا فى أسوان يوفروا فندق لإقامة المريض، والمرافق اللى بيجوا من محافظات كتير زى مثلا قنا وأسيوط والأقصر والحاجات اللى حوليها دى، وغير كمان فى أماكن فى القاهرة لاستضافة المريض خلال فترة العلاج والمتابعة، حاجات كتير بيوفرها برنامج ابن السبيل ده، اللى لسه مستنى طبعاً يتوسع ويشمل حاجات كتير وأكتر بكتير".