الرغى متواصل .. بدون فاصل
أكدت الدراسات أن السيدات تتحدث فى المتوسط بما يقرب من 20 ألف كلمة في اليوم الواحد ، مقابل 7000 كلمة فقط ينطقها الرجل طوال يومه، بحسب صحيفة اليوم السابع المصرية.. يعنى بالبلدى كده مراتى بتتكلم يوميا ضعف كلامى 3 مرات .. ومابتفصلش خالص زن ورغى .. ورغى وزن طول اليوم .
ده حتى الأجهزة بتفصل وتريح وتحتاج شحن كهرباء زى المحمول واللاب توب،لكن المدام ماشاء الله .. بتفتح على الرابع رغى متواصل .. بدون راحة ولا حتى فاصل .
وقد تمكّن العلماء من الوصول لتفسير تلك الظاهرة .. ففى دراسة أمريكية حديثة، أن النساء لديهن مستوى أعلى من البروتين فى المخ يعرف بـFOXP2 والذى يتعلق بالتواصل اللفظى .
وقام الباحثون فى هذه الدراسة التى نشرت مؤخراً بجريدة “Neuroscience”، بدراسة مقارنة على فئران المعمل ثم طابقوا نتائج الدراسة على البشر.
ونظر الباحثون فى مستوى بروتين FOXP2 عند الأطفال، وتبين أن مستوى البروتين فى سن 4-5 سنوات عند الفتيات يكون أعلى بنسبة 30% عن الأولاد من نفس العمر.
وتعلق الباحثة شيريل سيكى، من قسم علم النفس بجامعة ميتشيغن، على الدراسة قائلة إن هناك صلة واضحة بين ارتفاع مستويات بروتين FOXP2 وبين كثرة الحديث.
ومادام العلم قال كلمته خلاص ليس على زوجتى حرج وملام وعتاب .. إتكلمى براحتك بقى وغردى يامراتى وانطلقى واشجينى من طلوع النهار لتانى يوم .
والمدام بتبدأ يومها معايا بالموشح الرسمى على الصبح وأنا بستعد للخروج للشغل .. لازم طبعا تنكد عليا،المدام : إنت لابس البدلة دى ليه ..ومتشيك كده ليه .. عندك ميعاد ولا ايه ؟ .
قلت : يامدام إرحمينى متشيك ايه وزفت ايه ؟ هو اللى متجوز واحدة زيك يتشيك ولاحتى يروح مواعيد،المدام : امال حاطط ريحة كتير كده ليه؟ .
قلت : الصبر من عندك يارب .. ياهانم أنا رايح الزفت الشغل وعلشان رايح الزفت الشغل لازم البس زفت كويس.. ولازم احط زفت بارفان كويس ..علشان بحضر إجتماعات مع مسئولين مهمين إرتاحتى بقى .
المدام : ومالك شايط كده وبتزعق ليه .. إنت شكلك عامل عمله سودة،مانا عرفاك عينك زايغة وأكيد بتلعب بديلك برة البيت..صدق المثل : يامأمنا للرجال .. يامأمنا للمية فى الغربال .
قلت : ياست أنا ماليش غيرك إنتى حياتى وبينا عشرة طويلة وأولاد،المدام : ايوة يااخويا كل بعقلى حلاوة .. أنا لايمكن اصدقك أنا عارفة الرجالة .. الخيانة فى طبعهم و بتجرى فى دمهم .
قلت : خلاص بقى على الصبح ..عايز أروح الزفت كفاية حرقة دم،المدام : ماشى مسيرك تنكشف وتقع وأعرف سرك فى يوم من الأيام ..طيب سيبت مصروف البيت .
قلت: ايوه،المدام : سيبت كام يعنى ، قلت: 100جنيه ، المدام : طيب إنت جاى على الغدا،قلت: الله اعلم،المدام : طيب إعمل حسابك تجيب معاك فاكهة وبسبوسة وجاتوة وحاجة ساقعة .
قلت : ليه إن شاء الله مانتى معاكى 100 جنية،المدام : اصل ماما جاية تتغدى عندنا اليوم،وبعدين إنت بتسمى ال 100 جنية دى فلوس ، قلت : إرحمنى يارب .. بقولك ايه إحتمال اتأخر فى الشغل شوية النهاردة .
المدام : أول ماعرفت إن ماما جاية عاوز تهرب..هيه ماما عملت لك ايه،قلت: كفاية إنها خلفتك،المدام : بتقول ايه ياجوزى،قلت : كفاية إنها جابت لى أحلى وأجمل واحدة فى العالم .
المهم ياحضرات رحت الشغل ومن قرفى وزهقى مش عارف المحفظة نسيتها فى البيت ولا ضاعت فى الطريق .. عمال اتصل على محمول المدام مشغول .
والعيال مش فى البيت اللى فى المدرسة بيمتحن واللى فى الجامعة..وأنا هاتنقط ساعة ارن على المدام مافيش فايدة .. وتذكرت عبارة شهيرة تقول : الصمت ذكر .. والثرثرة انثى .
المهم الآخر ردت عليا بعد ماطلعت عينى،قلت : الووو ياهانم كل ده رغى فى المحمول،المدام : كنت بكلم ماما بس بطمن عليها وأشوفها هاتيجى الساعة كام عندنا .
قلت : طيب لو سمحتى شوفى المحفظة بتاعتى موجودة على الكومودينو ولا ضاعت،المدام : موجودة ياجوزى اهيه ، قلت : طيب الحمد لله سلام .
المدام : كنت عايزة حاجة، قلت: إتفضلى،المدام: ايه رأيك نروح مصيف أسبوع قبل رمضان، قلت: لما إرجع نتكلم فى الموضوع ده..أنا عندى شغل دلوقتى .
المدام : يووه هو أنا معرفش أكلمك وبعدين إنت أساسا مش جاى على الغدا،قلت : يامدام أرحمينى، المدام : ارحمنى إنت وقول موافق على المصيف علشان ارتب امورى مع ماما واخواتى البنات نطلع كلنا مع بعض .
قلت: نطلع كلنا مع بعض..هههههههههههه أنا مش طالع مصايف خالص،المدام: إنت دايما تسد نفسى كده..مافيش مرة تحاول تسعدنى، آه يابختى آه ياقسمتى آه يانصيبى .
قلت : ارحمينى واقفلى الزفت المحمول وبطلى رغى الله يكرمك.. إنتى ايه مستوى بروتين FOXP2 عندك عالى خالص،المدام : الله يسامحك ياجوزى وبتشتمنى بالانجليزى كمان .