مبتدا

المدام : خلاص يا جوزى بلا مصيف بلا وجع دماغ .. خلينا فى المهم إيدك على 1000 جنيه،قلت : ليه إن شاء الله ؟ .. المدام : إنت ناسى رمضان على الابواب كل سنه وإنت طيب هات بقى الفلوس علشان الحق أجيب خزين البيت قبل الاسعار ماتزيد والمواد الغذائية تختقى من السوق.

قلت : ألف جنيه ياهانم حرام عليكى .. ده أنا مرتبى كله على بعضه بالحوافز والإضافى 1250 جنيه،المدام : طيب ماهو هايفضل معاك 250 جنيه.

 قلت : ياهانم إنتى ناسية بيتخصم من الراتب قسط سلفة اللاب توب اللى جبته لحضرتك وبيتخصم قسط سلفة شاشة التلفزيون الكبيرة اللى إنتى دبستينى فيها.

وبيتخصم قسط سلفة سداد مصاريف دخول المدارس،المدام : خلاص خلاص اسكت إنت ماصدقت وهاتقعد تسد نفسى بالكلام عن الأقساط والسلف.

قلت : مش دى الحقيقة،المدام : هو أنا يعنى خدت الفلوس وصرفتها على أمى وأبويا ماهو كله اتصرف على عيالك ياخويا ..وكتر ألف خيرى إنى ممشيالك البيت بالمرتب الضعيف ده.

قلت : ياستى المثل بيقول على قد لحافك مد رجليك ودى ظروفى وإمكانياتى، المدام : أنا ماليش دعوة اتصرف أنا عايزة 1000 جنيه يعنى عايزة 1000 جنيه.

قلت : طيب ممكن أعرف عايزة تشترى ايه إن شاء الله بالفلوس دى،المدام : بس كده من عينيه ياحبيبى،وراحت قاعدة جنبى على الكنبة وقالت: صلى على النبى.

قلت : عليه الصلاة وأفضل السلام ، المدام : فى طلبات أساسية لازم أجيبها زى 10 كيلو لحمة و 5 كيلو لحم مفروم و10 فرخات و5 كيلو كبده و5 كيلو فراخ بانية،قلت: ياسلام كل ده.

المدام: على فكرة اللحمة والفراخ والكبدة والبانيه دول ميزانيتهم لوحدها تعدى ال 1000 جنيه بتوعك..بس أنا هاتصرف كنت عاملة جمعية صغيرة هاتمشى الحال،قلت: ياسلام.

المدام: وعندك بقى لازم أجيب طماطم وأعمل صلصة علشان إنت عارف الطماطم مجنونة وممكن تختفى من السوق،قلت : والله إنتى اللى مجنونة، المدام: بتقول ايه؟، قلت: بقول إنتى حرمنا المصونة.

المدام : آه بحسب وعندك بقى الزيت والسكر والارز والمكرونة والشعرية والفول والجبنة والطحينة و السمن واللوبيا والفاصوليا الناشفة والتوم والبصل والبطاطس ..الخ الخ.

قلت:خلاص خلاص إنتى ايه راديو وإتفتح،المدام : اعمل ايه مش إنت عايز تعرف هاشترى ايه بالفلوس..ولسه كمان ياروحى البلح وقمر الدين وعين الجمل والفستق واللوز.

قلت : والله كتر خيرك يامراتى،المدام: إنت بتتريق ده بخلاف بقى الحاجات اليومية زى الزبادى والكنافة والقطايف والخضار والسلطات والفاكهة والعصائر والتمرهندى والعرقسوس.

قلت: يامدام رمضان شهرعبادة وصيام وصلاة وقرآن،المدام : ماشى ياحبيبى أنا معاك .. بس برضه لازم ناكل ونشرب ونعيش ولا إحنا مش بشر زى باقية الناس.

قلت: طبعا بشر زى باقية الناس بس المفروض نمشى على قدنا وربنا بيرزق،المدام: نعم نعم ناقص تقولى تعالي ناكلعلى مائدة الرحمن أنا وإنتى والعيال.

قلت : والله فكرة حلوة ياحياتى علشان نتفرغ للعبادة وننسى الدنيا شوية.. وبعدين احنا مش أحسن من الناس اللى بتفطر على موائد الرحمن فى رمضان.

المدام: إنت باين عليك إتجننت خلاص وعقلك طق .. على آخرة الزمن تبهدلنى وتفطرنى فى الشارع لا لا لا ده موضوع مايتسكتش عليه خالص.

الدنيا ولعت ياحضرات والمدام شاطت وإتصلت بحماتى وهات يارغى، المدام: شفتى ياماما بالذمة ده كلام موائد الرحمن ياماما، حماتى : يابنتى إرحمى نفسك بقى من العذاب ده.

المدام : طيب أعمل ايه ياماما عقلى خلاص تعب،حماتى: والله معاكى حق تتعبى ده جوزك ينقط .. سيبى البيت و تعالي عندنا ريحى أعصابك من الهم ده.

قلت : ياحبيبتى رمضان على الأبواب ماتخربيش البيت بإيدك،المدام: سامعة ياماما بيقول ايه،المدام: خد كلم ماما ياأستاذ ، قلت : الوووووه أيوه ياماما.

حماتى: بلا ماما بلا زفت..إنت عايز ايه بالظبط..لما إنت مش قادر تفتح بيت بتتجوز ليه..وتبهدل بنات الناس معاك ليه اسمع بنات الناس مش لعبة.

قلت : انتى بتكلمينى كده ليه..أنا بحترمك علشان انتى حماتى..لكن مش من حقك تتدخلى فى حياتى..وأنا بقى تربست فى دماغى وقررت هانفطرعلى مائدة الرحمن مرة كل اسبوع .

حماتى: زوج بنتى ده مش عاقل خالص.. الله يكون فى عونك يابنتى،المدام: جوزى جوزى جوزى،قلت: فيه ايه تانى، المدام : نسيت أقولك تشترى فوانيس رمضان للعيال .