مبتدا

بحب جدا أجواء عيد الميلاد أو الكريسماس، كل بلاد العالم بتبقى شبه بعضها، الشجر اللى مليان أنوار والزينة مالية الشوارع..والشجر المتزين الموجود فى البيوت. 

بحب صورة النار فى المدفاه الى بتبقى على الكروت والى بتبقى جنب الشجرة وتحتها علب وعيلة متجمعة كل حد فيهم جاب فيها هدية للتانى..وفكرة بابا نويل جميلة جدا..ان فيه حد حيجيب لك هدية نفسك فيها..الى اخترع الشخصية عبقرى..فيها إحساس كدة أن حاجة حلوة مستنياك..ومش بقيمتها المادية خالص بل بقيمتها المعنوية..كل أجواء الكريسماس أو عيد الميلاد فيها أمل.

بعيد عن كل تفكير دينى أحب أقول لكم أن الأوروبيين اللادينيين أو الملحدين بيعتبروا هذا العيد من أهم أعيادهم ..ومحدش يقول لى دا تقليد للغرب أو مش تبعنا أى حاجة فيها بهجة تبقى تبعنا..فكر فيها بشكل اقتصادى الناس نازلة الأسواق تتفرج على الزينة وتتصور جنب الشجرة..فكر فيها شكل جمالى حتحس أن الزينة حلوة جدا..فكر فيها بشكل عاطفى حتلاقى أن الألوان المرتبطة به زى الأخضر والأحمر ألوان بتدى طاقة إيجابية .

فكر فيها بشكل خيالى فكرة أن فيه بابا نويل ..شخص جاى من القطب الشمالى يحقق لك أحلامك ..أو يجيب لك هدية نفسك فيها..عيد الميلاد ومظاهره بتفضل لبعد رأس السنة ..كانه فاصل بين سنتين سنة بتخلص وسنة بتبتدى ومعاها أحلامنا بان الى راح خلاص مشى والى جاى ميلاد جديد بآمال جديدة وحلم كبير أن تغيير التاريخ إما تزيد السنة سنة الساعة 12 بالليل..حيخليها أحلى وأحن علينا....وأنا بحب أصدق أن بابا نويل حقيقى وأنه حيجيب لى هدايا يحطها جنب الشجرة حتى لو ماجبش..بحب أصدق انه موجود فى حتة على الأرض ..يمكن لأنه وجهه طيب ومبتسم دايما..يمكن لأنه زى الأحلام بنحب نصدقها.. كل سنة وقلوبنا جميعا بتحلم ومليانة أمل.