
إسعاد يونس
وقالت يونس "أول يوم فى سنة جديدة، كل سنة وأنتم طيبين.. محظوظة إنى أكون معاكم النهاردة فى أول يوم فى السنة، محظوظة إنى أعيّد عليكم وأقولكم كل سنة وانتم طيبين، سعيدة إنى أقولكم يا رب اللى فى نفسه حاجة تتحقق، واللى 2017 كانت سنة صعبة عليه، يا رب 2018 تعوضه، وتعوض عليه، وتكون دخلتها عليه وعلينا باليمين، وميشوفش ولا نشوفش معاه فيها غير كل خير، واللى كانت 2017 سنة حلوة فى حياته، يا رب يا أخويا تكون 2018 أحلى وأحلى، واللى جاى فيها خير وبس، فرح وبس، سعادة وبس، رزق متعبى فى مقاطف وبراميل لا له أول ولا له آخر، قولوا آمين".
وأضافت: "استقبلوا سنتكم الجديدة بابتسامة، واستبشروا بيها وفيها خير، قرروا أن أول يوم ده تبتسموا فيه فى وش كل اللى تقابلوه، بمناسبة، ومن غير مناسبة، وليه من غير مناسبة، هو فى مناسبة أحلى من سنة جديدة، انسوا كل اللى حصل إمبارح، خلاص عدى وفات، واللى باقى منه سحابة صيف، واللى جاى كله حلو، قول كده فى عقل بالك وأنت بتستقبل السنة الجديدة، اللى جاى كله حلو بإذن الله".
وتابعت يونس "وأنا غرقانة فى كل الأفكار دى، وشحنة الإيجابية اللى بشحن بيها نفسى وجاية ناوية أصدرها لكم، افتكرت حملة مصر الخير والبنك الأهلى، حملة تزينوا بالأخلاق، من أحلى الحاجات اللى اتكلمنا فيها فى الفترة الأخيرة، وأحلى حاجة نبتدى بيها سنة جديدة، تزينوا بالأخلاق، مجموعة القيم اللى مصر الخير والبنك الأهلى قرروا يدعموها ويأكدوا عليها، ويعيدوا تأصيلها بين أفراد المجتمع المصرى، قيم الأخلاق الحميدة، قيم الإنسانية المطلقة، قيم قدّ ما هى متأصلة وموجودة كل واحد فينا، قدّ ما اتربينا من واحنا عيال على أنها بديهيات، قد ما غابت النهاردة من ناس كتير، قدّ ما تاهت عند البعض وسط زحمة الدنيا ومشاغل الدنيا وتعب الدنيا وقرفها كمان، قد ما ضعفت عند البعض قصاد قيم سلبية تانية كبرت وغرست جدورها فى مجتمعنا وقلوب وعقول الناس، الرحمة، الجدعنة، العطاء، التسامح، الذوق، الكلمة الطيبة، الأصول، النخوة، الثقة، الاحترام".
وأوضحت "كل قيمة من دول تستاهل يتكتب فيها مجلدات، كل قيمة من دول كافية تبنى مجتمعا قويا ومتماسكا، ودولة عدالة وتقدم وانتاج حقيقية، وغياب أى قيمة من دول كافى يهد عمدان أكبر وأهم مجتمع، مهما كان قوى أو غنى أو متماسك، تخيل قيمة زى الثقة مثلا تغيب بين البشر، إزاى ممكن نبص فى وش بعض، حتى مش نتعامل أو نعيش مع بعض، نبص بس، تخيلوا غياب قيمة زى الرحمة بين أفراد أى مجتمع، ميبقاش مجتمع بقى، ده يتحول فوراً لغابة، لا وحتى الغابة فيها رحمة وتراحم، قانون الغابة ده فيه رحمة برده، يتحول المجتمع لحاجه كده ملهاش وصف ولا تورد على بال بنى آدم، مش بس الثقة والرحمة".
وقالت "كل القيم اللى بتأكد عليها حملة تزينوا بالأخلاق، اللى بتقوم بيها مصر الخير مع البنك الأهلى دى، هدفها الارتقاء بالمجتمع من خلال التأكيد على القيم النبيلة فيه".
واختتمت "ابدأوا سنتكم الجديدة بتزينوا بالأخلاق، ابدأوها برحمة وثقة وكرم، وكلمة طيبة، ابدأوها بالأصول والذوق، والعطاء والتسامح، والنخوة، ابدأوها بكل خير، وإن شاء الله تنعاد عليكم بكل خير، زى مبؤلكم كده، تزينوا بالأخلاق".
