التطور.. ربنا يكفينا شره

وقالت يونس: "من 130 سنة فقط لا غير، العالم الأمريكى توماس إيديسون توصل لطريقة لتشغيل المصباح الكهربائى فى البيوت والمبانى، والاختراع دا اللى هو فى الآخر اللمبة العادية، الاختراع دا نقل البشرية نقلة كبيرة جدا، ويعتبر أهم حاجة عملتها البشرية من ساعة ما الإنسان البدائى اكتشف النار، أه والله زى ما بقولك كده".

ساعة ما إيديسون أعلنت عن منتجه الصحافة الأمريكية كانت بتتكلم عن إن البشرية خلااااص وصلت لقمة العلم والتكنولوجيا، هتروح فين خلاص مفيش أى تطور ممكن يتعمل أو أى اختراع بعد أننا هنور البيوت بالكهرباء.

وتابعت: "نفسى اللى قالوا كده يبقوا موجودين دلوقتى، ويشوفوا العالم وصل لفين إنما مش دا اللى عاوزه أقوله دلوقتى، أنا عايزة اتكلم عن حاجة تانية مهمة وخطيرة جدا، فى الـ100 سنة اللى جت بعد المصباح الكهربائى، حصل تطور أكبر بكتير من كل التطور اللى عاشه الإنسان طول عمره على الأرض، اللى هو على الأقل ملليون سنة مثلا.. ملليون سنة موصلناش فيهم للى وصلنلاله فى 100 سنة، الإيقاع دا موقفش بالعكس استمر، لو حسبنا اللى وصله الإنسان فى الـ30 سنة الأخيرة، هنلاقيه أضعاف اللى حصل فى الـ100 اللى قبلهم، يعنى اللى عملناه فى 30 كان أضعاف أضعاف أضعاف اللى عملناه فى ملليون سنة".

ودا معناه إن سرعة التطور بقت رهيبة جدا، فى الوقت اللى حضرتك بتسمع فيه الحلقة دى العالم فى أول الحلقة غير فى آخرها، كل لحظة فى اكتشاف كل لحظة فى تطوير، كل لحظة فيه جديد، أنا لسه فاكرة كأنه امبارح لما كانت فرقة الأصدقاء بتغنى عن جيل التليفزيون باعتباره يعنى الأكثر وعيا وتطورا، واللى عنده الفرصة يشوف العالم من الصندوق العجيب.

وأضافت الإعلامية : "النهاردة حفيدتى أول حاجة اتعلمتها أنها تـscroll the smart phone، اللى عمره مايزيدش عن 6 سنين اللى هو تطور الموبايل، اللى عمره مايزيدش عن 20 سنة، أيوة دا برضه معناه إيه يعنى؟؟ معناه إننا كأشخاص أولا وكمجتمع ودولة ثانيا لازم نكون واعيين أوى للتغييرات دى، ماعدش ممكن أبدا أن الإنسان يعيش على وتيرة واحدة، جيل والدى ووالدتى مش هقول جدى وجدتى كان عنده الفرصة يعيش طول حياته على إيقاع واحد وعادات واحدة وفكر واحد ويربى عياله عل الإيقاع دا والأفكار دى، بس دلوقتى دا مش ممكن".

واختتمت حديثها عن التطور قائلة: "أنت لو خلفت 2 أو 3 والفرق يعمل 10 سنين مثلا كل واحد من العيال دى محتاج طريقة تربية مختلفة على حسب التطور، يعنى مثلا كنا بنحكى حواديت لولادنا قبل النوم، حواديت بسيطة معناها بسيط بتحبب الاولاد فى المعانى البسيطة اللى عاوزين نوصلها، هل الحواديت دى تنفع دلوقتى؟ هل هتكون مثيرة لخيال طفل دلوقتى بيشوف يوتيوب بكل حاجة فيه؟ أهو اليوتيوب دا اللى بيتطور كل يوم كمان كام سنة هيبقى قديم، زى ما بقى الفيديو قديم والسى دى بقى قديم والدى فى دى قديم، وهتطلع حاجة تانية بتكنولوجيا تانية، تخلى المستخدم بقى متوحد أكتر مع الجهاز اللى فى إيده، إحنا بقى لازم نسابق الزمن علشان نقدر نستفيد من التطور دا والاهم من الاستفادة إننا نتقى شره وربنا يستر، أه والله زى ما بقولك كده".