سانت كاترين

وقالت يونس "سانت كاترين، المنطقة السياحية الجميلة ومقصد أغلب هواة تسلق الجبال فى مصر ومحبى المغامرات، ده طبعا بالإضافة للسياحة الدينية، وزيارة دير سانت كاترين".

"أحلى منظر، أحلى منظر شروق فى الدنيا ممكن تشوفه من فوق جبال سانت كاترين.. دى أكتر جملة ممكن تسمعها من اللى زارو سانت كاترين قبل كده، بس فى نفس الوقت هتلاقى أغلب اللى زاروا سانت كاترين بيحكولك عن برودة الجو هناك حتى فى عز الصيف، درجة الحراة فى دير سانت كاترين بتكون فعلا منخفضة، فى الشتا بقى يالهوى، أصل سانت كاترين المنطقة الوحيدة فى مصر تقريباً اللى ممكن تشوف فيها تلج، آه والله بمعنى كلمة تلج، ده بالإضافة للعواصف التلجية اللى أحيانا كتير جداً بتمر على المنطقة".

وتابعت: "فاكرين طبعا من كام سنة لما حصل أنه مجموعة شباب زى الورد كانوا فى رحلة هناك، وتاهوا واتعرضوا لعاصفة ثلجية، وراح منهم أربع شباب، والباقى أصيب بشدة، وكان حادث وجع قلب مصر كلها فعلا وقتها بشدة، ربنا ما يرجعها أيام".

وأضافت "البرد فى دير سانت كاترين كوم تانى خالص، حاجة كده أوروبا يعنى مش هزار، مرتفعة عن سطح البحر، وصحراوية كمان، ففيها كل العوامل اللى تخلى البرد فى الشتا صعب جدا، فى نفس الوقت سانت كاترين مش مدينة سياحية وبس، لأ بقى ده فيها قرى وقبائل وسكان عاديين وطرق ووديان ومدقات، وأماكن جبلية صعبة جداً، صعبة جداً فى كل حاجة، صعبة فى ظروف الحياة، وفى طريقة الوصول ليها، وفى النهاية هم مواطنين مصريين ومحتاجين لمساعدة، الحقيقة بقى أن "مصر الخير" مبتنساش حد خالص، مبتنساش حد محتاج لمساعدة مهما كان هو فين ولا مين".

وتابعت يونس "مصر الخير" وصلت لأهالى سانت كاترين فعلاً، وقامت هناك بحملتها المعروفة بحملة الشتا، وفعلاً وبحضور إعلامى متميز، زى أحمد يونس اللى بيعمل "كلام معلمين" على راديو 9090، الواد ده جميل قوى أنا بحبه قوى، ده بقى راح كشريك إذاعى للحملة، وتم توصيل وتوزيع الحملة على المستحقين، وتم توزيع منتجات الحملة على قرى الأسقف والسباعية اللى بتبعد لأكتر من 6 كيلو متر فى قلب صحراء سانت كاترين، دى كانت الحملة الأولى اللى توصلهم فى حياتهم، وكانوا السكان فى منتهى السعادة أنه فى اللى فاكرهم وحاسس بمعانتهم مع البرد فى المنطقة الصعبة دى.

وقالت "ده بقى الجميل فى "مصر الخير"، وصولهم لكل المستحقين طول الوقت، واهتمامهم الدائم أنهم يوصلوا المساعدات مهما كانت الظروف والأعباء والصعاب اللى ممكن يتعرضولها، يا ريت فعلا اللى بتعملة "مصر الخير" مع كل شركائها فى حملاتها الإنسانية والمجتمعية يكون نموذج يحتذى لكل الأنشطة الخيرية فى مصر، ندور على المستحقين، نفتش على المنسيين، نكشف النقاب عن المشاكل علشان نقدر نوصل لحلول، سواء بقى حلول مؤقتة أو جذرية، بس عمرنا ما نوصل لحاجة لو مكتشفناش المشكلة أصلا، أو مثلا لو استصعبنا الحل، أو لو استصعبنا توصيل الحل، تحية لجميع القائمين على مشاريع مصر الخير الإنسانية والاجتماعية، ونشد على إيديكم، ونقولكم استمروا، ولسه المشوار طويل، وكلنا هنكمل معاكم، وإيدنا فى إيدكم لحد ما نوصل لكل المستحقين فى كل مصر، آه والله زى ما بؤلك كده".