مشروع ابن السبيل

وقالت إسعاد: "مصر بلدنا كبيرة كبيرة مش بس كبيرة فى القيمة والمكانة، مش بس فى عدد السكان، لكن كمان فى المساحة والمسافة بين مدنها المختلفة من شمالها لجنوبها، من بحريها لقبليها، آه والله زى ما بقولكوا كدة، ولهذا أوقات كتير بتحصل مشكلات لما الواحد يكون فى مدينة وتضطره الظروف يروح مدينة تانية، خصوصًا لو مش هيعيش فيها بشكل دائم، هو بس مطلوب منه يعمل حاجة ويرجع بلده تانى، زى ولادنا وبناتنا اللى بيجيلهم تنسيق كلية بعيد عن بيت أهلهم، اللى هيروح جامعة القاهرة وهو من الصعيد، أو جامعة المنوفية وهو من كفر الشيخ أو جامعة جنوب الوادى وهو من حلايب وشلاتين مثلًا".

وأضافت: "زى أهالى المريض اللى مش بيلاقى علاج فى مدينته أو قريته فيسافر بلاد وبلاد وأهله يسافروا معاه فى مستشفى بعيد، طب المريض هتستقبله المستشفى، إنما أهله يعيشوا فين، بتحصل حاجات كتيرة أوى زى دى، ومينفعش نعتمد على التصرفات الشخصية حتى لو كنا كمصريين أهل كرم لكن دى حاجة بقت كتير، لدرجة أنها محتاجة تركيز خاص، ومشروع يستهدف الحاجات اللى زى دى، ينظمها يرتبها ويكون عنده وعى بكافة الحاجات اللى تستدعى توفير أماكن إقامة، وأماكن الإقامة دى بقى جاهزة برضو تحت إشراف من الجهات المعنية، عشان مكيونش فى فوضى، والمحتاج فعلا هو المستفيد".

وأوضحت: "مشروع مثلاً زى ابن السبيل ده عملاه مؤسسة مصر الخير فى أماكن كتير جوه مصر وبراها بالنسبة للطلاب فدول أماكن إقامتهم بيكون فى المدن الجامعية، بس المدن دى ساعات كتير مش بتقدر تستوعب كل الطلاب اهو بقى عندك نقص تجهيزات، سرير دولاب كرسى، الحاجات البسيطة دى للطالب لما بتكون لأعداد كبيرة بتكلف كتير أوى طبعا".

وتابعت: "مشروع ابن السبيل بقى دعم التجهيزات دى، ودعمها لـ1500 طالب وطالبة فى محافظات الجمهورية خلال السنة اللى فاتت وبيستعد عشان يكبر العدد المستهدف السنين اللى جاية كما ساهم أنه يعمل بيت الطالبات فى المنوفية عشان يستوعب بناتنا اللى بيدرسوا هناك، واللى هما مشل لاقين لهم مكان فى المدن الجامعية، وبيت الطالبات ده بتديره الجامعة نفسها عشان نضمن أنه ميفرقش حاجة عن المدينة الجامعية نفسها خصوصًا فى رعاية البنات".

واستكملت: "كمان طلاب حلايب وشلاتين فى جامعة جنوب الوادى، دول لهم اهتمام مخصوص، ودار الوافدين للطلبة اللى بيدرسوا فى الأزهر من بره مصر وملهوش مكان فى مدينة المبعوثين وطلاب بنى سويف ودار الطلبة فى التجمع الخامس وتكوين قاعدة شبابية جوه كافة المدن الجامعية، مستشفى الأورام بأسوان مثلا ومستشفى 57357 توفير أماكن إقامة لأسر المرضى، عشان يقدروا يعيشوا بشكل كريم، وفى برضو شوية خصوصية، ويقدروا يخدوا بالهم من المريض وكمان مكان الإقامة يكون قريب من المستشفى، المصريين المقيمين فى الخارج اللى منهم بيتوفاه الله، مشروع ابن السبيل بيتكفل بنقل الجثمان لأن تكلفة نقل الجثمان الواحد بتبقى مش أقل من 25 ألف جنيه، ونقل الجثمان بيتم تحت إشراف وزارة الخارجية".