إسعاد يونس
قالت إسعاد: "سمعت آخر نكتة؟ بيقولك مرة واحد كيت كيت كيت هاهاهاى، طب خد أنت دى اتنين بلدياتنا راحوا كيت كيت كيت هاهاهاهاى، المشهد ده كان من المشاهد المعتادة عند المصريين ممكن تشوفه فى كل مكان، فى البيت، على القهوة، فى الشارع، فى الشغل، فى الزمالك، فى بولاق، فى قاعدة رجالة، فى قاعدة ستات، فى قاعدة صحاب شباب ولاد ولابنات، أه والله زى مبؤلك كده، النكتة كنت من أهم الحاجات اللى بتميزنا كمصريين ودايما يقولوا عن المصرى إنه ابن نكتة، الوصف ده زى ماكلنا عارفين مش تقليل ولا فيه أى نوع من أنواع الاستخفاف، بالعكس النكتة دى مرتبطة بمعانى إيجابية جدا".
وأضافت: "النكتة بنت الحكمة، لما تكون عاوز تلخص حاجات كتير ومعانى مهمة وفلسفة فبتقول يا إما مثل يا إما نكتة، وكتير من الأمثال بتحس بردوا إنها نكتة، زى اشترى له بدرهم بلح بقى له فى الحى نخل، وطمعنجى بنى له بيت فلسنجى سكن له فيه، من كتر ارتباط النكتة بالحكمة عندنا اخترعنا شخصية عظيمة بيدرسها العالم كله بمنتهى الجدية، هى شخصية جحا، اللى بيقدر من خلال نكتة أو موقف بسيط يضحكك ثم يخليك تفكر ثم توصل فى النهاية للبكا، هو ده اللى قال عنه الشاعر العظيم المتنبى كم ذاب مصر من المضحكات ولكنه ضحك كالبكا، كمان النكتة نوع من المقاومة، مقاومة ظروف الحياة سواء على المستوى الشخصى أو المستوى العام".
وتابعت الإعلامية: "إحنا اللى اخترعنا تعبير هم يضحك، أيوة إحنا بنواجه هممونا بالضحك زى مقال عمنا كلنا سيد حجاب أقسى همومنا تفجر السخرية، النكتة بردوا علامة مهمة على العلاقة بين الناس وبعضها، أمتى تعرف أن فلان بقى صاحبك؟ وإنك بقيت قريب منه وبقى قريب منك وبقى في بينكم عشم وود؟ في علامات من أهمها أنكم ابتديتوا تقولوا لبعض نكت، عشان كده لو حد غريب قال نكتة قدامك ومفيش بينكم المساحة دى تلاقيكى بتقول بشكل تلقائى أنت هتصاحبنى؟ النكتة كانت علامة صحوبية، النكتة ليها عند المصريين أكتر من معنى مهم وأكتر من دور أهم، إنما فين النكتة دلوقتى؟".
وأردفت قائلة: "مبقاش عندنا نكتة زى زمان، النكتة اللى تلعب الدور ده بقى عندنا حاجات بديلة زى القلشة والكوميكس والبرامج الساخرة إلخ إلخ، إنما الحاجات دى بصرف النظر عن إنها بتضحك ولا لا تحسها كده زى الأكل المسلوق حاجات خفيف متشبعش أو وجبات سريعة تاكلها على الواقف كده وتجوع بعد نص ساعة، حاجة كده زى الفرق بين الكوميديا أيام نجيب الريحانى ودلوقتى".
وختمت بقولها: "تحس الموضوع اتقلب اسكتشات وشوية إفيهات لفظية جايز تضحكك وقتها وغالبا يعنى مش هتضحك لكن الأهم إن مفيهاش حاجة هتنساها بمجرد متتقال، كل الأشكال دى مع احترامى يعنى مش بتاعتنا مش أصلية ولا أصيلة، غالبا بتبقى تقليد لحاجة معمولة برة وإحنا استوردناها كده مش بتساعد على اللمة أوى ولا ينفع حتى تقولها فى قاعدة، ولا ينفع تشارك بها الناس اللى بتحبهم، مش عارفة يمكن مزوداها إنما فعلا مشتاقة أسمع آخر نكتة، أه والله العظيم زى مبؤلك كده".
