إسعاد يونس
وقالت إسعاد: "شيما يحيى، مروة سامى، اسمين لمعوا مع أسماء كتير، كان نفسى اذكرهم كلهم 151 عازفة بمدربيهم، دول بقى أعضاء أوركسترا النور والأمل، اللى عمل حفلات كتير جوه وبره، خلال الـ5 سنين اللى فاتت عمل حفلات ناجحة جدا انبهر بيها العالم كله، آه والله زى ما بقولك كدة، الانبهار هنا مش بس لمستواهم فى العزف ولا للمزيكا الجميلة اللى لعبوها، لكن لأنهم قدموا مستوى عالى من الانسجام والهرمونى مع أنه بيعزفوا من غير نوتة موسيقية ولا مايسترو يوجههم بعصاية المايسترو، اللى بتقود أى أوركسترا فى العالم، لأنهم ببساطة فتيات مصريات كفيفات".
وأضافت: "أوركسترا النور والأمل جزء أو مشروع من مشروعات كتير تحت عنوان واحد هو قطاع مناحى الحياة، اللى مؤسسة مصر الخير بتنفذه، وتشرف عليه، واللى بيقوم على خدمة ناس من ولادنا، محتاجين أوى للى يمد لهم أيده، مش يعنى تساعدهم بحاجة، تساعدهم على أنهم يبقوا أفراد طبيعيين عاديين قادرين يعتمدوا على نفسهم ويفيدوا ويستفيدوا من المشروعات دى، تأسيس مراكز لحاجة بيسموها تأهيل المرتكز على المجتمع، اللى هو ايه بقى؟ ده نشاط أقرته منظمة الخدمة العالمية هدفه تأهيل الأطفال اللى عندهم إعاقات مختلفة فى مراحل مبكرة بحيث يقدروا يندمجوا فى المجتمع اللى هو فيه، وأنه يتيح لهم الفرض فى جميع مجالات الحياة".
وأوضحت: "ومن خلال المشروع ده المؤسسة نجحت فى أنها تقدم الخدمة دى لـ4500 طفل وأكتر من 1500 مدرب، مشروع تانى قايم على تدريب وتوظيف ذوى الإعاقة المشروع ده اشتغل على توفير فرص عمل أساسية للشباب، بالتعاون مع موقع فرصنا".
واستكملت: "الحقيقة أن مشروعات مرسسة مصر الخير فى القطاع ده تحديدا، لما شوفت وتابعت لاقيتها أكبر من الحصر فى نقط 1 و2 و3، لو بس قولنا عناوين المشروعات عايزين 3 أو 4 حلقات من البرنامج ده، اللى هو مثلا دعم ذوى الإعاقة رياضيا، إنشاء مدراس لتعليم ذوى الإعاقة ودعم جمعيات تانية متخصصة فى مجال ذوى الإعاقة، دعم الجمعيات دى بيكون بالأساس من المشروعات اللى هدفها تشغيل الأعمال اللى ممكن يقوموا بيها، فى كمان كم هايل من المشروعات زى مشروع تنمية الإخلاق والمواطنة اللى هو لتدريب ومتابعة 250 أخصائى نفسى من المتميزين فى تطبيق مضمون البرنامج على 12 ألف مراهق فى 90 مدرسة و500 مراهق فى 25 جمعية أهلية، مشروعات كتير فى كافة أنحاء الجمهورية فى الصعيد وفى بحرى، شغل مباشر شغل من خلال جمعيات تانية، أكاديمية مصر الخير مشروع، أنا ونحن لبناء شخصية الأطفال مشروع قيم وحياة مشروع حكايات على 4 عجلات، اللى هو المكتبة المتنقلة، مشروعات لحفظ التراث، أكثر من منظومة شغالة بتفيد آلاف وآلاف من أولادنا، بصراحة الشغل اللى زى ده هو اللى الواحدة مننا تتحمس له، وتابعه بحب وإعجاب وهى بتقول دايما ربنا معاكم وإحنا كمان معاكم، آه والله زى ما بقولكوا كدة".
