مشهد من فيلم الأرض
كان للعلايلى عدة مواقف كوميدية خلال تصويره بعض الأعمال السينمائية، كان أبرزها فى أثناء تصوير مشاهد الغطس فى فيلم الطريق إلى إيلات عام 1993 مع الفنان محمد سعد، والذى قال عنه خلال لقاءه ببرنامج صاحبة السعادة مع الإعلامية إسعاد يونس: "خضنا مغامرات كتيرة فى هذا الفيلم، وفى مواقف كتير كما تموت من الضحك".
وأضاف: "أنا فاكر محمد سعد وإحنا لسه فوق المركب وهندخل جوه عرض البحر ومفيش هزار، فالناس عمالة تنط وبتاع، لقيته جانى على جنب كده وقالى: هى الحكاية دى جد؟ يعنى هننزل فى المية بجد؟ قلت له أيوه يا محمد بجد وأكيد هننزل المية".
وتابع: "لقيت محمد سعد بدأ يرتعش وبتاع، قلتله ما تخفش يا محمد بدلة الإنقاذ اللى هنلبسها هتعومك حتى لو أنت فى المحيط، قلت له متقلقش خالص هتترمى فى المية بس هتعوم، وفين لما اقتنع، وأول ما نزل ولقى الموضوع سهل قالى ده أنا كنت بضحك معاك".
أما الموقف الثانى كان مع المخرج الكبير يوسف شاهين فى أثناء تصوير فيلم الأرض، والذى قال عنه: "كنا بنصور فى شهر طوبة وشاهين مواعيده مش بتهزر والدنيا تلج، فاديت لفلاح فلوس وقولتله انزل كدة الترعة شوفلى عمق الميه راح ورجع قالى خد فلوسك يا بيه الميه تلج هو انت هتنزل هنا، قولته آه، قالى إزى الميه مليانة ديدان.. مبقتش عارف أعمل إيه ولقيت يوسف شاهين ماسك زجاجة قد صباعه وينقط فى الميه قولتله إيه ده يا جو قالى مطهر، ضحكت وقولتله ده اللى هيطهر يعنى، قالى يلا نط عشان نصور والمشهد ده خد تصوير نصف يوم".
وعن بداية علاقته بشاهين قال: "فى واحد جه قالى يوسف شاهين عاوزك، وأنا فكرتى عن شاهين إنه تنك، وفى يوم كان عندى ناس سهرانة ومشيوا متأخر والشقة كانت مبهدلة والصبح بدرى لقيت الباب بيرن فتحت لقيت يوسف شاهين، دخل قالى إيه الدوشة دى فرديت عليه قولتله معلش كان عندى ناس سهرانة، فقالى عموما أنت هتمثل معايا فى فيلم الأرض يلا حضر نفسك للتصوير".
وتابع: "اتفقت فعلًا على الفيلم من غير حتى ما اقرأ السيناريو، وكانت أيام تصوير فيلم الأرض من أجمل لحظات وأمتع أيام عشتها فى حياتى".
