سميرة سعيد: أنا قوية ومش ممكن أصرف على راجل ونفسى ابنى يتزوج وأنا عايشة

كشفت النجمة سميرة سعيد تفاصيل جديدة عن حياتها الشخصية وتربيتها لابنها شادى، قائلة: "أنا بدأت أتعود على الوحدة، وعمرنا ما هنقدر نستغنى عن الحب والحنان لغاية آخر نفس فى حياتنا".

وأضافت سميرة سعيد فى الجزء الثانى من برنامج "السيرة" مع الإعلامية وفاء الكيلانى المذاع على قناة Dmc: "تجاربى مع الرجل طلعت بيها إن لو مفيش احترام ومودة بلاها العلاقة أفضل وكمان لو العلاقة مش متكافئة".

وعن إمكانية أن تصرف على رجل قالت: "لا طبعا محبش أصرف على رجل، ولكن لو هو مش قادر يصرف عليا وأنا مقتدرة ممكن أصرف على نفسى وهو يصرف على نفسه طلاما فى احترام".

وعن ابنها شادى قالت سميرة سعيد: "أنا طلعته إنسان محترم وزرعت شوية قيم جواه وإزاى يحترم والدته وأصدقاءه والمرأة بشكل عام، ويكون إنسان يقدر يواجه المجتمع"، وتابعت : "أكيد بحلم أجوزه وأكيد هكون مبسوطة لو اتجوز وأنا موجودة فى الحياة، بس هو عنده 25 سنة ولسه مبدأش حياته العملية بشكل واضح عشان بيدور فى كذا حاجة لسه، ولازم يقدر يواجه الحياة ويبدأ يكسب فلوس وينتج ويفتح بيت عشان يبقى راجل مسئول".

وتحدثت سميرة سعيد عن تعرضها لمشاكل فى بدايتها الفنية، قائلة: "اتحاربت فى الأول بس وكان فى مشاكل لما بقيت اشتغل فى مصر، ونقابة الموسيقيين منعونى من الغناء لتكرار ظهورى فى أكثر من مناسبة، وإتاحة الفرص لمطربات اخريات، واضطررت وقتها أرفع قضية وكسبتها".

وتابعت سميرة سعيد: "أنا قوية من جوايا لكن كل فترة يجينى تفكير يداهمنى بأنى أسيب المجال، وطول الوقت أشوف صوتى اختلف وشكلى اختلف، وباخد الرد الفعل من الناس ومن التسجيلات، وأنا يوم لما أحس انى مش قادرة خلاص أو مبقتش زى الأول مش هستنى حد يقولى حاجة".