مدكور يرد على مهاجميه بشأن بوست السُلفة : واحدة صرفت فلوس وعايزانى أسددهم

كشف الإعلامى شريف مدكور، سبب رفضه التام التجاوب وتقديم المساعدة إلى أفراد يطلبون الأموال منه عبر مواقع التواصل الاجتماعى على سبيل "السُلفة"، حيث قال: "مش أول مرة أكتب بوست زى ده، كل سنة بكتبه، عشان بيجيلى رسائل يومية من ناس مختلفة تطلب منه أموالًا".

تابع: "على سبيل المثال واحدة تبعت تقولى مساء الخير يا أستاذ شريف بعد إذنك عاوزه استلف منك 100 ألف جنيه عشان اشتريت حاجات وجوزى ميعرفش وعليا ديون، ادهملى وأنا هدهملك بعد سنة ".

وأضاف "مدكور"، خلال مداخلة هاتفية فى برنامج "الحكاية"، مع الإعلامى عمرو أديب، الذى يُعرض على شاشة "mbc مصر"، أنه يصدم من هذه الرسائل ويكون الرد عليها " لا يا فندم بعتذر لحضرتك"، لكنه يجد الرد عليه: "ليه  لأ، ما انتوا بتقبضوا ملايين قد كده".

وتابع موضحًا أن شخصا آخر أرسل له رسالة يقول فيها: "أنا اشتريت موبيل بس عشان مفيش شغل من 4 شهور مش قادر أدفع القسط بتاعه وعاوز 6 آلاف جنيه"، موضحًا أنه كتب هذا البوست من أجل أن تكف الناس عن تلك الطريقة.

وأوضح أنه وجد هجوما غير طبيعيا من الكثيرين: "رغم أن الناس دى لا من عائلتى ولا من أصدقائى فى العمل ولا زملائى، دول لو مزنوقين هسلفهم، إنما دى ناس معرفهاش، وبعدين إيه بتقبضوا بالملايين فسلفونا دي، الأمر غريب" .

ورد عليه عمرو أديب: "أنت من فترة عملت فيديو وأنت فى البيت بتاعك، ناس كتير شافت عندك بيت حلو، ناس كتير قالت ما يسلفنا ما نبعت له"، فرد عليه شريف مدكور: "والله  من قبل موضوع البيت بيحصله كده، ولقيت ردود لناس فى سكة مش عارف فيها إيه ما تسلف الناس".

وتابع: "ناس قالت ما الناس دعيت لك وأنت عيان ما تسلفهم، مش عارف ليه دخلوا الأمور فى بعض، مش قادر استوعب، أنا شخصيًا وأنا عيان مطلبتش من حد يدعيلى، طلعت قلت حالتى الصحية، بس مستعطفتش الناس وقولتلهم ادعولى، ومش هعمل كده، الناس كده بتطلب بطريقة فجة، الموضوع كبر قولت اكتب البوست ده عشان محدش يبعت لى، ولسه بيبعتوا حتى بعد ما كتبت البوست".

وأوضح أنه حال عرض عليه حالة صحية لمريض لا يستطيع العلاج أو أسرة لا تستطيع دفع مصروفات المدارس قد يتدخل، وأضاف قائلا: "ممكن حالات نعرف المستشفى فين أو المدرسة فين نروح ندفع، بس بلاقى الناس تقول لأ حولى على حسابى، الموضوع بقى غريب".