حمو بيكا
ونشر "بيكا" صورة له عبر صفحته الرسمية على موقع التواصل الاجتماعى، وعلق عليها ردًا على المتنمرين عليه قائلًا: "بتقولوا عنى جاهل ومش متعلم.. مع أن دى حاجة أنا عمرى ما أنكرتها ولا حتى خبيتها على الناس، ومن يوم ما ربنا كرمنى واتشهرت وبقى ليا جمهور.. بس هرجع وأقولكم تانى إنها حاجة مكنتش بإيدى".
وتابع: "أنت بقى يا متعلم، التعليم علمك أنك تقعد تعاير الناس بعيوبها، التعليم علمك أن تفضل تتنمر على خلق الله، التعليم علمك أنك مباح ليك الشتيمة فى حد هو أقل منك فى شئ، أكيد لا فمتجيش من ورا شاشة وكيبورد تعمل فيها عم الناصح، وأنت أصلًا موركش حاجة تعملها".
واستطرد: "أنا متعلمتش ومنولتش الشرف الكبير ده بس أتعلمت حاجات كتير فى الدنيا أنت متعلمتهاش لسه، أتعلمت احترم الكبير والصغير.. أتعلمت أشقى وأتعب من صغرى أتعلمت إنى مغلطش فى حد.. أتعلمت حاجات كتير جدًا فى حياتى أنت عمرك مهتتعلمها طول ما أنت باصص للناس".
واختتم قائلًا: "فكر فى كلامك كويس وكومنتاتك كويس قبل ما تكتبها، وقبل ما تقول أنك متعلم أفتكر أنك فى "تربية وتعليم" يعنى التربية قبل التعليم".
وفى وقت سابق هنأ حمو بيكا، طلاب الثانوية العامة، قائلًا: "ألف مليون مبروك لإخواتى وحبايبى اللى نجحوا فى الثانوية العامة.. وإن شاء الله تحققوا كل أحلامكم، وهاردلك لكل اللى منجحوش، قدامكم لسه بدل الفرصة ألف فرصة تعوضوا وتحققوا كل اللى بتتمنوه".
كان صديق حمو بيكا، مطرب المهرجانات عمر كمال، أثار أيضًا، موجة غضب عارمة من قبل متابعيه على صفحته الرسمية بموقع "فيسبوك"، بعد تعليقه المثير للجدل على نتائج الثانوية العامة، بعد أن نشر صورة له وعلق عليها: "جبت 90%.. جبت 70%.. جبت 40%.. الشاطر اللى يعرف يجيب فلوس فى الآخر".
