البث المباشر الراديو 9090
إسعاد يونس
قالت الإعلامية إسعاد يونس فى برنامجها "زى مبؤلك كده" المذاع على الراديو 9090: يوسف شاهين فى أول مشاهد فيلم "حدوتة مصرية" واقف بيوجه منير للحركة فى المشهد، منير راكب عربية وشاهين بيقوله "أول ما أقولك اتحرك تدخل على طول".

وتابعت: منير بيرد عليه: أدخل يمين يا أستاذ؟ شاهين بيستعجب: هتخش فى الديكور يا منير؟

المشهد دا بيلخص واقعنا المرورى بشدة، مع أن شاهين ماكنش قاصد، ويمكن قاصده وإحنا مانعرفش.

المهم أنا كنت سارحة كده فى الملكوت وبتفرج على فيلم "حدوتة مصرية"، وحسيت أن منير هنا كسر الإشارة، شاهين عايزه يدخل طوالى ومنير عايز يدخل يمين يعنى يكسر عليه، يعنى يكسر كلامه، دماغى قعدت تروح وتيجى شوية شمال وشوية يمين لقيت أن موضوع كسر الإشارة دا وراه حدوته وأكيد وراه قصة، وإنتوا عارفين طبعًا لازم أدور وأعرف وأجيب الزتونة.

رفعت سماعة التيليفون كلمت حد معرفة قارى كده ومأنتك وسألته بشكل مباشر تعرف مين أول حد كسر الإشارة؟ الراجل سهّم شوية كدة.. وقال لى الإشارة أنهين؟ قولت له هتفرق؟ ما كل الإشارات واحدة.

قال لى لا تفرق طبعًا لما تكسرى إشارة فى قصر النيل غير لما تكسرى إشارة فى شارع الشيخ ريحان، تكسرى الإشارة على المحور عند "هايبر" غير لما تكسرى إشارة فى مصر الجديدة.

سألته تانى مين أول واحد كسرها، قال لى الموضوع دا قديم أوى لدرجة أن المؤرخين تعبوا أوى أوى على ما عرفوا يأصلوه ويأسسوا حواديده، فى شبه إجماع أن أول واحد كسر الإشارة كان آمين شرطة.

كان مستعجل ومتأخر على معاد دفتر الحضور كسر الإشارة بعربيته، زميله آمين الشرطة ماحبش يعمله مخالفة وعدت الحدوتة على خير، بس كان فى مواطن "سوسة" واقف فى الإشارة لما شاف الآمين كسرها وعدت الحدوته على خير عمل زيه، بس الآمين اللى واقف خدمة لسعه مخالفة، وكانت خناقة على طريقة أشمعنى هو وأنا لأ، ومن يومها الشعب كله بقى فى حالة كسر للإشارة.

أنا مصدقتش وحاولت اشترى مابعش قولت أدور على حد تانى يرسينى ويخلينى اشترى، كلمت واحدة صحبتى من ذوات المال والجمال والحسب والنسب، قالت لى أول واحد كسر الإشارة فى مصر كان باشا كبير أوى أيام الملك فاروق ولأنه كان صاحب الملك وبيسهروا سوا، الموضوع عدا لكن كان فى واحد من الأفندية شاف الباشا بيكسر الإشارة عمل زيه.

مش مهم بقى مين أول واحد عمل كدة؟ المهم ليه بنعمل كده؟ مستعجلين ولا مش خايفين؟ بنكسر الإشارة لإننا مهمين وحاسين إننا فوق القانون ولا شطارة وفهلوة وإشمعنة أنا، الصراحة بقى بعد تفكير قررت أنا كمان أكسر الإشارة.

 

تابعوا مبتدا على جوجل نيوز


اقرأ ايضاً