البث المباشر الراديو 9090
إسعاد يونس
قالت الإعلامية إسعاد يونس فى برنامجها "زى مابؤلك كده" على الراديو 9090 أن "من المعلومات اللطيفة اللى بيدرسوها فى علم السلوك أن حول البنى آدم دايرة نصف قطرها 50 "سم"، دى إسمها المنطقة الشخصية".

وأضافت: الجزء بتاعك اللى من حقك تتحرك فيه براحتك ومش من حق العالم يخترقوه بدون إذن أو سماح منك، إلا للناس القريبين أوى، ولادك مراتك أبوك أمك.. دا كلام فارغ.. والله زى مبؤلك كده.

اتفقنا أصلًا إننا شعب عشرى والخصوصيات دى ملناش فيها أوى ونحب كده نقرب من بعض، ده غير إن أصلًا الدنيا زحمة.

الزحمة دى بتلغى المنطقة الشخصية وبتمحى فكرتها، فبتبقى ليها صلة دائمة بالبشر، ودا بيترتب عليه حاجات أغلبها مش ولا بد.

يعنى بنكون مضطرين نتعامل مع أغلب الروايح البشرية طول النهار، وكتير أوى بيتعمدوا ينسوا النصائح الأبوية والمدرسية، ماتعرفش يا أخويا نسيان ولا تناسى، ولا إكمن النفر طول وفرع وترعرع يبقى خلاص يعنى.

النظافة الشخصية دى مش مقتصرة على العيال ودورنا مابينتهيش بتعليمها للعيال، مهما كبر النفر لازم يصحى "يتس" وشه بشوية مياه، آه وربنا لازم، هى دى فيها نقاش كمان؟ لازم يفتح حنكه ويتعامل مع فرشاة الأسنان والله لازم.

ماينفعش نركب الأتوبيس ولا الميكروباص ولا المترو ونتحشر حشر بزر الجوافة، وفوق الزحمة والحر مطالبين نستحمل الروايح اللى طالعة من الناس اللى قررت تفحفح من كل "سنتيميتر" فى جسمها.

دا إحنا بنحكى فى بديهيات، حاجات بنعلمها للعيال مع الـ"كخ" والـ"دح"، وكمان مش بنتكلم فى "الأوفر" منها، يعنى مش بنتكلم فى البرفان "والشاور جيل" والمناديل المعقمة، دا إحنا يا عم بنتكلم فى الممارسات الطبيعية المتعلقة بالنظافة الشخصية والصحة العامة، الموضوع مش مكلف، لكن السبب تكبير الدماغ.

إحنا بنتكلم فى حسبة "10" جنية فى الشهر "صابونة ومياه وفرشة أسنان"، طب إيه بقى؟ استسهال ولا كسل، النظافة سلوك مش ممارسات.

ولا بقى سلوكيات العبط بعد الأكل وخصوصًا "الوجبات السريعة"، الكل بيعمل نفسه من مدغشقر مش "بنها"، وينسى أو يتناسى يغسل إيده ويمسح فى هدومه أو فى الكرسى.. دا إحنا بنشوف بلاوى.

كمان مرة.. مش بنتكلم فى رفاهية، النظافة الشخصية حوار أبعد ما يكون عن الرفاهية، دا موضوع له علاقة بالاستمرار فى الحياة.

 

تابعوا مبتدا على جوجل نيوز


اقرأ ايضاً