إسعاد يونس
وقالت: "قام واقف يا سيدى وصرخ بعلو صوته: "هاتولى راجل"، ده كان أشهر فيديو كوميدى فى 2013، حاجة تفطس من الضحك".
وأضافت يونس، خلال برنامجها "زى مبؤلك كده"، على الراديو 9090: "الناس بقى استلمت الإفيه ده وهاتك يا شغل، برامج بقى اتعملت على حس "هاتولى راجل"، وعملوا فيلم "هاتولى راجل" بطولة أحمد الفيشاوى، ونمنا وصحينا بقى تريند ومكسر الدنيا ولا أغانى عمرو دياب.. ومن يومين كدة وأنا حاضنة الدفاية وبحاول أمنع أبعاث الكينونة فى الظروف اللا متناهية فى الصقيع، لقيت حد فى الشارع بيقول هاتولى راجل أكلّمه، قلت فى عقل بالى راجل إيه فى البرد ده يا حج".
وأوضحت: "الصراحة حسى التاريخى اللى جوايا صحى قلت مش ممكن يكون هو أول واحد قال كدة، اللى هو الراجل اللى قال هاتولى راجل ده، دى كلمة مهمة هننسبهاله هو لوحده يعنى، مين اللى قالها؟ وإمتى؟ وفين؟".
وأكدت: "الصراحة بعد مجهود ولف وتدوير وبحث خد منى وقت كتير أوى، اكتشفت أن أول واحد قال هاتولى راجل كان الخليفة العباسى، آه وحياتك زى مبؤلك كده، الخليفة العباسى المستعصم لما سمع أن اللى تولت الحكم فى مصر بعد وفاة الملك زوجته شجرة الدر، قام ناطط من عرش الخلافة وقايل: "هاتولى راجل"، هو مقالهاش كده بالصريح يعنى، بعت جواب وقال بالنص: "إن كانت الرجال قد عُدمت عندكم، فأعلمونا حتى نسير إليكم رجل"، يعنى بالبلدى هاتولى راجل.. وشجرة الدر يا عين أمها اضطرت تتنازل عن العرش، وجابوا راجل اللى هو عز الدين أيبك، اللى قتلته شجرة الدر، وبعدها شجرة الدر خدت علقة بالقباقيب لحد ما ماتت، طب الخليفة العباسى قال هاتولى راجل وجابولوا راجل والدنيا مشيت".
وقالت: "والأيام تجرى وفى بدايات القرن اللى فات أخونا قاسم أمين كتب كتاب تحرير المرأة، وكانت ليلة بيضة، الكل هاجمه والكل وقف ضده حتى أصحابه، بس مش دى القضية، القضية أن كل الناس فى نفس واحد قالت: "هاتولى راجل"، يعنى مش عايزين ستات، لا عايزين ستات تتعلم ولا تنتخب، ولا يكون ليها حقوق، وعدت ليلة عمنا قاسم أمين".
وأضافت: "وفى ثورة 19 لما فى وفد راح يقابل المعتمد الإنجليزى كان وفد من الحركة النسائية الوليدة أيامها، المعتمد الإنجليزى رفض يقابلهم وقال: "هاتولى راجل"، الله، ما الستات فى المظاهرات زى الرجالة بالظبط، والوطن ده بتاع الكل، بس المعتمد الإنجليزى أصر أنه يقابل راجل وجابوله راجل.. فضلنا كتير على كده؟ الصراحة آه، التاريخ مش معترف بالستات، حتى لما حتشبسوت أعظم ملكات التاريخ القديم، مسكت الحكم فضلوا وراها لحد ما ماتت وجابوا راجل مكانها، أصلنا مش معترفين بالستات".
وتابعت: "وهتلاقى فى تاريخنا الحافل الممتد عدد الشخصيات النسائية البارزة قليل جدًا، وكأن الشعب شعاره طول الوقت هاتولى راجل، متدونا فرصتنا يا أخى، ولا لازم أشدها بنفسى وبالعافية، مش الطيب أحسن ولا إيه؟".
