إسعاد يونس
وقالت إسعاد: "فى الجو البرد اللى ملوش ملامح ده.. وأنا بقلب على "يوتيوب" لقيت فيديو كليب كدة لمحمد عبدالوهاب موسيقار الأجيال، ولقيت أغنية مشهورة عنوانها: "أيها الراقدون تحت التراب جئت أبكى على هوا الأحباب"، متصورة وسط مقابر الإمام الشافعى متعرف المجاورين مش قادرة أميز ترب الغفير، الله أعلم، بس للأمانة كدة كانت حاجة فخيمة، شغل تلاتينات، وما أدراك بقى بشغل التلاتينات، حتى المقابر كانت فخيمة".
وأضافت: "ما علينا، الغنوة دى قلبت عليا المواجع، مش مواجع اللى راحوا، لا لأن اللى راحوا موجودين معانا دايمًا، لكن فكرتنى بحدوتة فيلم مشهور، وكان عنوانه: "مدافن مفروشة للإيجار"، كان بطولة محمود ياسين ونجلاء فتحى فى عز أزمة بداية ظاهرة سكان المقابر".
وأكدت: "الغنوة دى برضو فكرتنى بالفيلم اللى فكرنى بقصة سكن المقابر مين صاحب الفكرة النميسة المرعبة بتاعت سكن المقابر دى، مين؟ ببساطة كدة وعلى بلاطة التاريخ هو المعلم والقائد والكل فى الكل فى أى موضوع، يعنى لما نفر كتب التاريخ كدة نلاقى أن فى عصر الاضمحلال التاى اللى كان بعد الأسرة الـ 18 اللى هى كانت أهم أسرة فى التاريخ الفرعونى الدولة المركزية الفرعونية انهارت، وحصل انحلال للقوى، وبقى فى فوضى فظيعة والناس سكنت فى المقابر الملكية، تخيلوا، المقابر الملكية اللى بتجى من آخر الدنيا تتفرج عليها، المصريين القدماء سكنوا فيها فى عصور الاضمحلال والفوضى، وكدة بقى وعلى بلاطة المصريين أثبتوا أنه شعب سابق فى كل حاجة، وفى أى وقت للأمانة".
وأوضحت: "بعد الفراعنة بشوية حلوين، فى عصر الفاطميين والمماليك الناس سكنت المقابر اللى بناها حلفاء والسلاطين المماليك، وانتشروا بين قرافة المماليك وجبل المقطم وكان فيهم بقى ناس صوفيين مشاهير زى مثلا الشاطبى، ومع الوقت بقى الحدوتة بقت عادة، بس مش لكل الناس بس مش أى حد يسكن فى المقابر، الحكاية مش سايبة لا مؤاخذة.. بس قبل ما أنسى بقى شامبليون شخصيًا اللى هو فك لغز حجر رشيد والأبجدية الفرعونية، لما زار مصر سكن فى مقبرة رمسيس التانى، هو والبعثة اللى كانت معاه، تخيلوا، نقلنا الفكرة للأجانب، ده إحنا جبابرة يا جدع، نرجع لحدوتة أن مش أى حد يسكن فى المقابر ومش أى مقابر تتسكن، الحدوتة ليها سيستم وتفاصيل، يعنى المقابر بتاعت البشوات، تحسها كدة ولا أجدع فيلا فى كومبوند لا مش أى حد يسكنها، والمقابر العادية ليها ناسها، وكله بتمنه، مهو السيستم له تفاصيله وناسه برضو".
وتابع: "عمنا خيرى شلبى كتب المقابر وسكنها أكتر ما كتب عن القاهرة وناسها، عمنا خيرى شلبى كان عاشق للحدوتة دى، ويُقال أنه فى فترة من فترات حياته، سكن فى حوش محترم بتاع باشا من باشوات بتوع الزمن اللى فات، وكان جايب واسطة، تخيلوا، شوفتوا السيستم، بس الغريبة بقى أننا الشعب الوحيد، اللى موسيقار أجياله غنى للراقدين تحت التراب، وجمهور قرر يعيش مع الراقدين تحت التراب، بس فوقيهم صراحة، ودى قمة الإعجاز العلمى والموسيقى، فى نفس واحد للأمانة.. دنيا".
