حازم إمام
وقال حازم، للإعلامى إبراهيم فايق، ببرنامجه "ملعب 9090"، على إذاعة الراديو 9090: "أنا سعيد جدًا بالانتقال إلى النادى السكندرى، أول مرة ألبس فانلة تانية غير تيشيرت الزمالك، بقالى 22 سنة بلعب فى القلعة البيضاء، طبعًا حاجة صعبة، لكن أنا رايح لنادى الاتحاد وهو فريق كبير وله جمهور عظيم".
أضاف: "أنا كنت حاسس أن المعاملة متغيرة بقالها فترة، وأنا مبحبش أكون تقيل على حد، حتى لو نادى الزمالك، وكنت طالب منهم أطلع إعارة، وأكيد أنا مش هفرض نفسى على حد".
تابع لاعب الاتحاد الجديد: "فى ناس لغاية دلوقتى متمسكة بيا وناس تانية مش عاوزنى، وطبعًا اللى بيحصل فى الزمالك مش كويس، وزعلت جدًا من طريقة رحيل حمادة طلبة للمصرى بهذا الأسلوب، وأنه مكنش عارف، وخد المعلومة من الإعلام، محدش بلغه خالص من الزمالك برحيله".
وقال حازم: "إحنا ولاد النادى أقل عقود فى الزمالك، شيكابالا بياخد 1000 جنيه فى السنة، ومحمد إبراهيم وعمر جابر وأنا، كلنا بناخد حاجات بسيطة تقريبًا 600 ألف جنيه، لكن اللى جايين من بره النادى بياخد الفلوس كلها".
وأوضح: "شيكا أول ما رحل عن فريقه البرتغالى السابق سبورتنج لشبونة الزمالك دفع عنه الغرامة، واللاعب وافق أنه ياخد ألف جنيه فى السنة ومتكلمش معاهم فى حاجة".
وواصل: "وبالنسبة للذى حدث فى جنوب إفريقيا من خناقة بينى وبين باسم مرسى، كانت مشكلة مُختلقة، حصل فى الخناقة أن الصحفيين كانوا قاعدين جنب اللاعبين على طول، وكنا بنفطر، وحصلت المشكلة وزمايلنا حجزوا ما بينا، لكن اللى بيحب يشوف حاجة معينة بيشوفها، والموضوع خلاص مش عاوز أتكلم عنه، لكن الموقف ده لو اتكرر تانى هيكون رد فعلى هو هو".
برنامج "ملعب 9090"، يرأس تحريره الصحفى أحمد درويش، وإعداد محمد عمارة، ويذاع 4 مرات أسبوعيًا، من الأحد إلى الأربعاء فى تمام العاشرة صباحًا، ولمدة ساعة.
