يوسف إدريس

وقالت يونس: "الكاتب الكبير يوسف إدريس كتب قصة مدهشة أوى قصة فى كام صفحة بسيطة لكن معناها كبيييير وممكن يتكتب فى كتب كاملة ويحل مشكلات كتير أه والله زى ما بقولكم كدا".

وتابعت: "فى القصة.. راجل محامى راكب قطر واللى راكب جاره خد وأدى معاه فى الكلام وعرف أنه محامى، فالراجل قعد يسأله أسئلة قانونية، ويحكيله حاجات بتحصله وإزاى يتصرف ويطلب منه يكتبله يتصرف إزاى ويرفع دعوى إيه ويروح فين والمحامى كان منزعج طبعا، الكلام اللى كان بيطلبه منه الراجل دا شغل، سيبك من أنه المفروض يبقى بفلوس، لكن برضه المفروض يتعمل فى وقته وفى مكانه، مينفعش تستغل الراجل وهو راجع من شغله أو رايح شغله فى مواصلة".

وأكملت: "المحامى فكر الراجل ده بيتصرف كده ليه؟ ووصل إنه –لمؤاخذة- مستهيف شغلته، إيه محامى؟ يعنى إيه محامى يعنى إيه يعنى، يعنى بيعمل حاجات بسيطة، وشوية كلام فى القانون وخلاص يعنى، بعد ما وصلوا نزل المحامى خد مواصلة تانية لبيته، جت قعدته جمب واحد قعد ياخد ويدى معاه فى الكلام، لقى جاره ده بيشتغل دكتور، طبيب باطنة، فلقى نفسه تلقائيا بيسأله أسئلة طبية ويشكيله من أوجاعه والصداع اللى بيجيله والنغزة اللى بيحس بيها وحاجات من دى، باختصار عمل فى الدكتور نفس الى عمله فيه جاره من شوية".

وأضافت إسعاد: "كتير لننا بيعمل كده وهو مش واخد باله، كتير مننا بيساهم فى الدايرة دى، والنتيجة النهائية سلبية، إحنا فى الأغلب بنحس أن اللى بيعمله الناس التانيين عشانا سهل وبسيط ومش مستاهل تقدير ولا حتى يستحق الاهتمام والشكر والمقابل الجيد".

وأوضحت: "فى مسرحية المتزوجون.. سمير غانم بيقول وهو المنجد بيعمل إيه يعنى بياخد القطن من هنا يوديه هناك وخلاص يعنى، اللى أفهمه كويس أن كل المهن وكل الأعمال وكل الجهود مهما كانت بسيطة، هى فى الآخر محتاجة تعب ومفهومية، واللى بيشتغلها بيتعرض بسببها لمتاعب كبيرة وكتيرة، العالم دلوقتى بيتهم باللى بنسميه أمراض المهنة، يعنى الحاجات اللى بيتعرضلها الشخص اللى بيشتغل مهنة معينة، والهيئات القانونية كلها بتشتغل على أنها تعمل أبحاث تطور المفهوم دا وتلاقى حلول لأمراض كل مهنة وطريقة تعويض عنها، وguess what ملاقوش مهنة واحدة على الكوكب أو على الكواكب المجاورة ملهاش أمراض معتادة ومتكررة.. المدرس معرض لكذا والدكتور معرض لكذا المطرب معرض لكذا والمدرس والمحاسب وهكذا".

واختتمت الإعلامية: "ظروف كتيير كتييييييير بتقول مفيش مهنة بسيطة، مفيش مهنة مش محتاجة جهد، علشان كده لازم كل حد فينا يحط نفسه مكان التانيين، مينفعش تهمل وتقول مهو عامل النضافة هينضف يعنى، مينفعش تلخبط فى أوراقك ودفاترك وتقول ماهو المحاسب هيسويها، مينفعش تستغل حد فى شغله من غير مقابل، لأنها جمعية ودايرة واللى بنعمله بنلاقيه.. أه والله زى ما بقولكم كدا".