الصوب الزراعية

وقالت يونس "واحنا صغيرين كان كل بيت فى مصر بيعمل نشاط ما، اللى عندها ماكينة خياطة ومش محترفة، هى بس بتخيط هدومها وهدوم العيال، واللى بتعمل مربى، واللى بتشتغل تريكو، واللى بيصلح أجهزة كهربائية، واللى واللى واللى واللى، آه والله زى مابؤلك كده".

الهدف من ده مكانش بس توفير فلوس تصرفها عند الخياط، أو فى شرا الهدوم أو فى تصليح الأجهزة، لكن كان فلسفة كده المصريين أدركوها بفطرتهم منذ آلاف السنين، وهى أنك لما تعمل حاجة بصلها من كل نواحيها.. حاول تعمل اللى يحقق أكبر فايدة من كل النواحى مش من ناحية واحده بس، اللى هو أنت هتشتغل لأن الإيد البطالة نجسة، اللى هو إن دى حاجتك فهتخاف عليها، اللى هو هتتعلم حاجة، وهتتعلم معاها قيم تانية زى الصبر، اللى هو هتتعلم إزاى تتصرف، اللى هو كمان ابنك وبنتك جمبك فهيشوفك ويقلدك، وهو كمان يكتسب خبرة، وحاجات كتير بتيجى فى السكة لوحدها.

وتابعت "الفكرة الفطرية دى لما نبص النهارده حولينا نلاقى ده اللى بتعمله مؤسسة "مصر الخير" فى كذا مشروع، أهمها يمكن مشروع الصوب الزراعية، اللى هو لما نعمل صوب زراعية فى مواقع معينة، الموقع الواحد ممكن يتعمل فيه 100 صوبة زراعية، المحاصيل اللى بتنتجها مش شرط تبقى فى الموسم بتاعها، تكلفة الصوبة الواحدة كلام فارغ جدا، اللى هو 20 ألف جنيه، لما نتكلم على حاجة اسمها مشروع بيجيب فلوس، فالعشرين ألف جنيه دول مينفعش أساسا يكونوا رقم، لكن من خلال مشروعات الصوب، الصوبة دى اللى بتتكلف 20 ألف جنيه بتجيب دخل 700 جنيه شهريا".

وأضافت يونس "مين اللى هيزرع الصوب دى؟ شباب المؤسسة بتسلمهم الصوبات، فلما الشاب يستلم 4 صوبات يقدر يكسب من خلالها 2800 جنيه شهريا، ده غير رأس المال أصلا يعنى، فلما تيجى تبص للموضوع من كل نواحيه تلاقيه كله جاى بفايدة، يعنى مثلا إنتاج الصوبة ضعف إنتاج نفس المحصول فى الأرض المفتوحة، تبصلها من ناحية الميه، استهلاك الرى فى الصوبة بيوفر حوالى 40% من الأرض المفتوحة، تبصلها من ناحية المحصول نفسه، توحيد إنتاج المحصول فى منطقة ما تضمن إننا هننتج محاصيل مهمة كلنا محتاجينها، وإننا نأمن جزء كبير من احتياجاتنا الغذائية".

وأوضحت "طيب بعد ما عملية الزراعة كلها تخلص، مش فى صناعات ومشروعات تكميلية، تعبأة، تغليف، الأمور اللى زى دى يعنى، بما معناه توفير منظومة عمل حتى لوكانت مش مقصودة فى حد ذاتها، طيب طول م أنت ماشى وبتفكر، تلاقى فى عائدات جاية من الشغل ده، لأن الشغل بيجيب شغل، وكل حاجة بتجيب اللى زيها، حتى النوم الكتير بيجب نوم كتير، والكسل بيجيب كسل، ده حتى الكلام بيجيب كلام يعنى".

واختتمت "مؤسسة مصر الخير نفذت فعلا 280 صوبة، استفاد منها 70 شابا وفتاة فى المنيا وبنى سويف، وفى 2018 إن شاء الله يعنى بإذن الله الهدف هو الوصول لقنا جنوبا وسينا شرقا، ومضاعفة عدد الصوبات والحفاظ على اللى اتعمل فعلا، مش قولت لك الشغل بيجيب شغل، بس النوم بقى مش هيجيب نوم، احنا فايقين ومصحصحين أو يعنى بنعمل حاجة فى اليوم أوعى النوم يجيب نوم، باى باى سلام عليكم، والله زى مابؤلك كده"