أسما شريف منير
وكتبت أسما: "سيبكوا تماماً من أنه أبويا بس أنا عايزة أقولكوا رأيى فيه كممثل.. هو عمل أصعب معادلة فى التاريخ وهى حفاظه على مكانته.. بحترم فيه جداً قوة رفضه حتى لو كانت الظروف بتجبره على أنه يشتغل، أنه زيه زى أى حد عنده بيت وعيال ومصاريف.. بس دة مخلاهوش ينحت".
وأضافت: "بيتعب جداً فى شغله و بيبذل مجهود فى تفاصيل الشخصية اللى بيلعبها، صبغ شعره أصفر، اهتم بصحته ولعب رياضة، عمل ست بكل تفاصيلها، اتعلَّم رماية عشان لو جاله دور ماسك فيه مسدس وبينشن على حاجة متبقاش مصطنعة، ركوب خَيل، أخد دروس عبرى عشان ولاد العم.. عمل كمان حركة ذكية، بيعمل أدوار تبان أن هى شبه بعض زى مثلاً لما عمل ست.. ناس كتير ممكن تقول أنا مش هعمل دور ست مرتين بس هو عمل ست فى حزمنى يا كوميدى، و عمل دور ست فى هستيريا دراما توجع القلب، من الفنانين القليلين جداً اللى معندوش مانع يخاطر مع مخرج جديد وكمان عمره ما استكبر أنه يشارك بطولة مع شباب جديد.. الراجل دة فضل صامد ومحافظ على مستواه الفنى من ساعة ما بدأ لحد انهاردة وعدى عليه ناس كتير ولسة محافظ على مكانته الخاصة.. أحب اشكره على مجهوده اللى عمله فى حياته كلها.. انا بفتخر ان اسمى على اسمه".
وتابعت: "ربنا يحبب فيك خلقه دائماً.. أما بقى علاقتى بيه كأب أكتر واحد بيتخانق معايا وبيسمعنى، صحبى جدا وبخاف منه احتراماً ليه لا وبخاف منه برضه مرعب جدا على فكرة، مرة جوزى كان بيحضنى قدامه جريت ونسيت أنه عادى.. حنين وصارم وطيب.. اتعلمت منه كتير اوى وشبه وفى حاجات كتير، سندى وضهرى".
