فيديو| والدة عروس المنوفية: بنتى جاتلى فى المنام قبل خبر وفاتها بـ 10 دقائق
والدة عروس المنوفية
وقال والد منار عادل الأقرع، والتى لم يتمالك نفسه من البكاء: "إنه زف ابنته وقدمها لعريسها فى الساعة الواحدة فجر يوم السبت، الماضى، ولكن قبل العصر من هذا اليوم، كانت قتيلة"، متابعًا: "ابنتى اتصلت بشقيقها فى الهاتف وطلبت منه الفستان التى كانت ترتديه فى يوم الحنة من أجل ارتدائه لمقابله صديقاتها".
وأضاف: "أنا سألتها انتى عاملة إيه وجوزك عامل إيه، قالت لى أنا كويسة وجوزى كويس الحمد لله، محمد ابنى راح يودى الفستان قابل صاحبتها فى الطريق، راحت معاه، مرة واحدة لاقيت ابنى بيتصل بيا بيقولى الحق يابا بنتك اتقتلت، روحنا المستشفى جريت لاقيتها ميتة".
فيما قال شقيق العروس، إن عددًا من الأطباء الشرعيين جاءوا إلى منزلهم اليوم وقالوا له "أختك كانت بكر"، وهذا ما أكدته العروس لشقيقتها فى الساعة الـ 10 من صباح يوم الواقعة.
وتابع شقيق العروسة: "قبل ما نوصل الشقة بـ 20 دقيقة، اتصلت عليها مرتين مردتش، اتصلت عليها صديقتها برضو مردتش، قولنا يمكن مستريحين أو بياخدوا دوش ولا حاجة، أتاريه كان بيقتل فيها"، موضحًا أنه عندما ذهب إلى منزل الزوجية الخاص بشقيقته القتيلة فتح لها الزوج الباب ورحب بيه وسلم عليه وعلى صديقتها، ولكن ملابسه كانت مليئة بالدماء، وكان يمسك فى يده سكينًا".
وتابع: "قلت له بهزار فيه إيه حد بيدبح فراخ يوم الصباحية، لاقيته سابنى وجرى، دخلت لأختى لاقيتها مدبوحة، جريت ورا زوجها ملحقتهوش، رجعت تانى لأختى، ورمينا حبة مياه على راسها بس كانت ماتت، ركبتها الموتوسيكل وروحنا بيها المستشفى لاقيتها ماتت، أنا عاوز حق أختى، طالب منكم كلكم تجيبوا حق أختى".
من جانبها، قالت والدة منار، إنها اتصلت بابنتها القتيلة الساعة العاشرة صباحًا، وسألتها عن صحتها، فقالت لها منار: "أنا كويسة يا ماما بس مش كلت عشان بطنى بتوجعنى"، موضحة أنها قالت لها: "حاولى تاكلى أى حاجة دلوقتى وهبعت يانسون مع أخوكى هيخلى بطنك كويسة".
وتابعت: "يا دوبك ابنى راح لأخته لاقيته بيتصل بيقولى الحقى بنتك مدبوحة، روحت حافية وجريت ولا لبست طرحة ولا شبشب، ربنا ينتقم من الظالم، يا رب ينعمل فيه زى ما عملوا فى بنتى، دى كانت واخدة صالة الفرح كلها رقص من أولها لآخرها"، موضحة أن ابنتها جاءت لها فى المنام قبل سماعها خبر وفاتها بـ 10 دقائق".
واستطردت: "لاقيت بنتى جات فى المنام قولتلها انتى جيتى ليه يا حبيبتى، قالت لى فى المنام، أيوة أنا جيت يا ماما، صحيت من النوم مفزوعة وقولت يا رب خيب ظنى، مفيش 10 دقائق وسمعت خبر القتل".
