اشترى دماغك وخلى كلمتك بره البيت.. نصائح حمادة هلال لحياة زوجية سعيدة

قدم حمادة هلال، عددا من النصائح إلى الرجال لحياة زوجية سعيدة، قائلا: "أنا وزوجتى أسما متزوجين من 2009، وأنا شايف إن الراجل تبقى كلمته بره البيت أحسن، وإن الجدعنة أنك تاكل كويس وبس، ولكن لو فى حاجة شايفها غلط لازم تتكلم طبعا ولكن مش على الفاضى وخلاص، لأن أنا شايف أن الراجل لازم تكون دماغها فاضية عشان شغله وكدة كدة الستات هيحشروه في أي حاجة".

وتابع هلال، خلال لقائه فى برنامج "واحد من الناس" مع الإعلامى عمرو الليثى، المذاع على قناة الحياة: "زوجتى طيبة وبنت ناس وكانت ممكن ترفض من البداية فكرة أن والدتى تبقى عايشة معايا، وتقول زى أى بنت عاوزة أكون مستقلة لوحدى ولكن هى كانت أحن عليها منى".

وأضاف قائلا: "سر السعادة الزوجية أن تتقى ربنا وتحاول بقدر الإمكان تشترى دماغك لأن مفيش بيت مفيهوش مشاكل ولازم لو حد شادد يكون فى حد هادى ويشترى دماغه الراجل، وأوحش حاجة فى الزواج لو البيت دخل فيه طاقة سلبية وبقى مشاكل بين الرجل والست".

واستكمل حمادة هلال: "عمرى ما كنت سى السيد فى البيت بالعكس أنا مهمل جدا، وأنا ساعات بغسل حاجتى لنفسى لو المساعدين فى البيت مش موجودين وممكن أعمل حاجة فى المطبخ ولكن ببهدل الدنيا".

وعن الموهبة لدى أبنائه قال: "يوسف ابنى بيحب الإخراج أوى ولكن شايفه ممثل ضعيف، أما بنتى راما صوتها حلو أوى وفى مرة كنت بسمع أغنية لماجدة الرومى حسيت أنى سمعت صوت راما، فبفكر أعملها أغنية ليها".