محمد دياب وعمرو سلامة
وكتب سلامة فى منشوره: "من 15 سنة وأنا بحاول أبدأ كمخرج كنت كل شوية أتكلم مع حد، يقول لى إنت بتفكرنى بكاتب جديد اسمه محمد دياب، وهو الناس بتقوله "بتفكرنى بمخرج جديد ااسمه عمرو سلامة".
وأضاف: "قولنا نتكلم فى التليفون، اتكلمنا، أول مكالمة قولتله أنا مخرج جديد ونفسى أعمل ما وراء الطبيعة قال لى إنه من أشد محبيها، وده كان أول عامل مشترك ما بينا سبب بدء الصداقة ديه".
وتابع: "وبسبب حاجات كثير فى ناس كثير بتتلخبط بينا، وده مجننا إحنا الإثنين، فى ناس تقولى بحب فيلم ٦٧٨ وناس تقابله وتنتقده على شيخ چاسكون".
وأردف: "مافيش فيلم ليه ماكنتش معاه فى التحضير وأوضة المونتاچ، ونفس الكلام هو بيعمله فى أفلامى".
وواصل: "اتعلمنا إحنا الإثنين درس زمان علشان اثنين منافسين يفضلوا أصحاب لازم يقدروا يسامحوا نجاح بعض، وأنا سامحته على فيلم الجزيرة اللى كتبه اللى كسر الدنيا وأصبح أيقونة وفيلمه اللى راح مهرجان كان، وسامحته على روعة فيلمه الجديد "أميرة" اللى شوفته فى المونتاج، ومسامحه إنه دلوقتى بيخرج مسلسل أمريكانى ضخم من إنتاج مارڤل وديزنى".
وأكد: "هو يمكن مش محتاج يسامح نجاحى لأنه طول عمره سابقنى، ولأنه أصلا صاحب فضل وسبب جوهرى وراء حاجات كثير كويسة حصلتلى فى حياتى المهنية أو الشخصية."
وأوضح: "مشتغلناش مع بعض ولا مرة إلا فى مسلسل طايع، وكانت تجربتنا سوا فى غاية التوافق والجمال مع خوفى قبلها الرهيب إن الشغل سوا ممكن يأثر على صداقتنا لكن بالعكس قوتها".
وشدد على أنه "الأجمل من ده كله إن مع إختلافنا فى آراء فنية أو فلسفية، عارفين نتجاوزها بسلاسة ومهما إتجننا على بعض فى نقاش ساخن، بنرجع نهرج وعمرنا ما إتخانقنا، وده سببه فى المجمل إن صداقتنا أقيم من أى فن أو فكرة".
واختتم: "بدون أى شعارات، محمد دياب من الناس اللى أقنعتنى فى الحياة إن الأخ مش لازم يكون الشخص اللى أبوك وأمك خلفوه، بل الشخص اللى بيحبك بجد".
جدير بالذكر، أن المخرج محمد دياب شارك بعدد المهرجانات العالمية بدأت بعرض فيلمه "اشتباك" فى مهرجان "كان" السينمائى عام 2016، وهو مؤلف ومخرج للعديد من الأفلام منها "الجزيرة" و"طلق صناعى"، ومسلسلات "طايع" و"السهام المارقة".
