شنودة فيكتور
وفى حلقة جديدة من برنامج بالمعدول، الذى يقدمه عبر "مبتدا"، اليوم السبت، أضاف شنودة فيكتور: "روايات مصرية للجيب، فى منتصف الثمانينيات ولحد بداية الألفية، كانت المجموعة القصصية الجميلة دى شديدة الوطنية والمصرية، هى متعة أجيال كتير، بتشرف إنى كنت واحد من الأجيال اللى اتربت على الثقافة المصرية الممتعة".
وأضاف: "لو حبينا نحطلها عنوان من كلمتين هيكون المصرى يقدر، سواء كان المصرى ده أدهم صبرى فى رجل المستحيل، أو كان نور ورفاقه فى ملف المستقبل".
وتابع: "النهاردة وإحنا فى أواخر 2020، ومصر تواجه من سنوات حرب الوعى، ولا زالت، ولسه قدامنا شوية سنين هنواجه حرب الوعى، عندنا أسلحة كتير قوى من نستخدمها ونستفيد منها".
وبين: "أحكيلكم حكاية الحاج حمدى مصطفى والدكتور نبيل فاروق، من منتصف الثمانينيات، أعلن الحاج حمدى مصطفى صاحب المؤسسة العربية للنشر والتوزيع والطباعة، عن مسابقة إنها عايزة ناس تكتب كتب وروايات مصرية للشباب، فاتقدم ناس كتير من ضمنهم الطبيب الشاب آنذاك نبيل فاروق القادم من طنطا، اللى نال إعجاب الحاج حمدى مصطفى، واللى شاف وتوسم إن هذا الشخص يقدر يقدم مجموعة قصصية محترمة".
وسرد فيكتور فى برنامجه مقدمة رجل المستحيل: "أدهم صبرى هو ضابط مخابرات مصرى يرمز إليه بالرمز (ن -1) حرف النون يعنى أنه فئة نادرة، أما الرقم واحد فيعنى أنه الأول من نوعه، هذا لأن أدهم صبرى رجل من نوع خاص فهو يجيد استخدام جميع أنواع الأسلحة من المسدس إلى قاذفة القنابل وكل فنون القتال من المصارعة وحتى التايكوندو، هذا بالإضافة إلى إجادته التامة لست لغات حية وبراعته الفائقة فى استخدام أدوات التنكر والمكياج وقيادة السيارات والطائرات و حتى الغواصات إلى جانب مهارات أخرى متعددة".
وتابع: "أما سلسلة ملف المستقبل فتحكى مغامرات الفريق العلمى المصرى بقيادة الرائد نور الدين محمود والذى يعمل فى المخابرات العلمية المصرية فى المستقبل، ويهدف إلى كشف الألغاز العلمية المختلفة التى تواجه المخابرات العلمية المصرية".
وأكد شنودة فيكتور: "لما مصر ابتدت مرحلة التحدى من سنوات فى البناء والإنجاز والتخطيط، وعلى التوازى بتواجه حرب الإرهاب والمخططات التى تتم ضد مصر فى كل حتة، ولما الرئيس كل يوم بيشتغل وبنشوف حتى يوم الإجازة الجمعة، وكل الأيام من برة وجوه والأقاليم والمحافظات والمشاريع والافتتاحات شغال هو وكل المجموعة اللى معاه".
واستكمل حديثه: "لما يبقى عندنا مجموعة قصصية مصرية زى دى مشتركة مع نفس الكونسبت اللى شغال بيه الرئيس، تحت عنوان المصرى يقدر، يبقى لازم أواجه كل المخططات الموجهة ليا، والتى تنشر اليأس، ولازم أدعو للتفاؤل والأمل والوطنية، ولازم أستغل مجموعات قصصية زى كده، لكن إزاى نعمل كده؟".
"الجديد عندنا اللى بنشوفه فى المنصات سواء المصرية مثل WATCH iT أو العالمية مثل نتفليكس، اللى ابتدت تعمل مسلسلات من الحاجات اللى بتبقى 6 أو 7 حلقات، طيب ليه مستغلش مجموعة قصصية رائعة زى دى، وابتدى إن أنا أنتج منها حاجة فى الإنتاج الدرامى ده، بحيث أورى للشباب إن أنا من 30 سنة فاتوا مصر فيها شباب شغالة، والنهاردة فى إنجازات على أرض الواقع".
