الثلاجة
السبب مش الرطوبة ولا درجة الحرارة، لكن غاز طبيعي اسمه الإيثيلين، بتفرزه بعض الفواكه أثناء النضج، وبيسرّع فساد الأطعمة اللي حواليها.
إيه هو الإيثيلين وليه لازم تهتم بيه؟
الإيثيلين هو هرمون نباتي طبيعي، بتفرزه بعض الفواكه والخضراوات وهي بتنضج. المشكلة إن الغاز ده بيشتغل كأنه "إشارة" لباقي الأطعمة إنها تسرّع عملية النضج، وده معناه إن الخضار والفاكهة الحساسة ليه بتصفر، وتطرى، وتفقد جودتها في وقت أقصر من الطبيعي.
مين أكتر الأطعمة اللي بتفرز الإيثيلين؟
لو عندك في الثلاجة تفاح، أو موز، أو أفوكادو، أو كمثرى، أو خوخ، أو مشمش، أو برقوق، أو بطيخ، فاعرف إنهم من أكثر الفواكه إنتاجًا للإيثيلين. والطماطم كمان بتفرز الغاز ده، وبتزيد كميته كل ما كانت الثمرة أكثر نضجًا.
ومين الضحية؟
في المقابل، فيه أطعمة بتتأثر بسرعة بالإيثيلين، زي الخيار، والبروكلي، والقرنبيط، والخضراوات الورقية، والبطاطس، والجزر، والبصل.
علشان كده، لو حطيت الطماطم جنب الخيار، غالبًا هتلاقي الخيار اصفر بسرعة وفقد قوامه. ولو خزنت التفاح جنب البطاطس، هتلاحظ إن البطاطس بدأت تنبت أسرع من الطبيعي، أما الجزر فقد يكتسب طعمًا مرًا بسبب قربه من التفاح.
إزاي تحافظ على أكلك؟
الحل بسيط، افصل الفواكه المنتجة للإيثيلين عن الخضراوات الحساسة له، وخزن كل مجموعة في مكان منفصل داخل الثلاجة.
كمان استخدم علب أو أكياس محكمة الغلق لتقليل تعرض الطعام للهواء، واحرص على أن تكون درجة حرارة الثلاجة بين صفر و4 درجات مئوية، مع الحفاظ على مستوى رطوبة مناسب، لأن التخزين الصحيح ممكن يطيل عمر الأطعمة ويوفر عليك خسارة جزء كبير منها.
