إسعاد يونس
قالت إسعاد يونس: "فى حاجات كتيرة حوالينا من كتر ما هى بديهية مش بناخد بالنا من أهميتها، أه والله زى مبؤلك كده، عندك مثلا السقف عمرك تخيلت لو بعد الشر بعد الشر مفيش سقف؟ قرى كتير أوى فى مصر فيها بيوت كتير من غير سقف أو سقف كولشن كان كده من سعف النخيل، وللأسف الشديد أهالى البيوت دى عايشين فى معاناة مستمرة، ييجى الحر مفيش حاجة تحميهم من الشمس، ييجى الشتا الوضع يبقى أصعب وأصعب ولما بتمطر البيت بيغرق، ولو البيت تحت جبل أو أى مرتفع لما بتنزل المطرة ممكن الله لا يقدر البيت بحاله كده يتشال".
وأضافت: "لو مفيش سقف البيت بيكون عرضة لكل أنواع الزواحف والحشرات على اختلاف ضررها، اللى بيوصل أحيانا للزواحف السامة، خصوصا لو البيوت دى موجودة جنب أراض زراعية فالبيئة بتبقى مهيئة تماما، البيت من غير سقف بيت مفيش حماية ولا أمان من أى ظرف، ومش بس الظروف الطارئة لا ده الظروف العادية نفسها متقدرش تستحملها، قبل دخول الشتاء مصر الخير هتبدأ حملة لترميم 2000 منزل للأسر الأكثر استحقاقا عشان يكونوا مستعدين لدخول الشتا بمطره عليهم، وبعد رصدتها لكل محافظات الجمهورية المختلفة والبحث عن الأكثر استحقاقا عشان دول يكونوا فى الأول".
وتابعت: "حكاية البيوت اللى من غير سقف كانت من الأولويات اللى حطتها مؤسسة مصر الخير فى مقدمة جدولها وعملت مشروع ترميم 2000 منزل فى الصعيد عشان يحمى أهالى البيت ويأويهم ويخليه بجد بيت، مشروع ترميم 2000 منزل من الحاجات اللى ممكن نفهم منها يعنى إيه تنمية مستدامة، اللى هو إحنا مش بنقدم مساعدة هتخلص بعد شوية وخلاص، إحنا بنعمل حاجة تستمر مع المستحق وتوفر له بيئة يقدر يكون من خلالها مواطن جاهز أكتر للشغل والإنتاج وممارسة الحياة الطبيعية، وده طبعا عن طريق إننا نضمن أن البيوت دى تكون آمنة وسليمة وملائمة للعيشة الكريمة".
وأردفت قائلة: "وكالعادة تنفيذ مشروع زى ده مش سهل عشان لما تيجى تسقف بيت المشكلة نفسها مش هتكون اتحلت عشان هتلاقى الأرضيات نفسها مش مستحملة فتروح للصرف الصحى تلاقيه أصلا مش موجود، ده غير أصلا عدم وجود ميه، فالأفضل أنك ترميم البيت نفسه، البيت كله على بعضه، عشان كده المشروع اسمه ترميم المنازل، وعليه قررت مؤسسة مصر الخير تعمل 4 تدخلات أساسية ورئيسية فى ترميم أى بيت، إيه بقى؟ تسقيف البيوت وتوضيب الأرضيات، شبابيك وأبواب وتركيب الصرف الصحى وعمل وصلة ميه، كمان مهم جدا تراعى البيئات المختلفة، يعنى لما تيجى تعمل سقف فى مكان طبيعته جبلية يختلف خالص عن مكان زراعى، يعنى مثلا لو قريب من النهر، غير بقى لو كانت البيئة جافة، كل حاجة لازم يكون معمول حسابها، عشان الجهد اللى بنعمله مايروحش والناس تستفيد بحق وحقيقى".
وختمت بقولها: "السنة اللى فاتت بدأت مصر الخير فى ترميم البيوت وكان الهدف هو الوصول لـ500 بيت وده بعد عمل حصر للبيوت اللى تستحق أكتر من غيرها، وخلال الموسم نجحت مصر الخير فى تسقيف وترميم أكتر من 1600 بيت، الموسم ده بقى الهدف بقى أكبر بس إحنا أدها وأدود".
