إسعاد يونس
وقالت إسعاد: "لما تقرا فى تاريخ الباشا الكبير، ولما نقول الباشا كده مجردة من الأسامى يبقى أهم باشا عرفته مصر فى تاريخها محمد على باشا، محمد على سماه المؤرخين أسامى كتير أوى منها مثلا مؤسس مصر الحديثة أو رائد النهضة المصرية أو بانى مصر فى العصر الحديث، وغيرها وغيرها، والواضح أنها ليها دايما علاقة بأسلوبه الحداثى وميلوه لتطوير وتحديث اللى عمله فى مصر، أصل هو الفكرة أن عصر محمد على ده كان غريب شويتين، الدنيا وقتها كانت قفزت مرة واحدة كده من الحصان للأتومبيل، من السيف للمسدس، دايما بيجى في التاريخ قفزات كده مفاجأة، قوم الأمم المتدهولة تقع في الحفرة اللى بين الزمنين".
وتابعت: "محمد على بقى مكنش عاوز مصر تقع فى الحفرة اللى بين الزمنين، المماليك كاناو متأخرين ودماغهم وقفت ومكنوش ميالين للتطوير، ومصر المملوكية مكنتش شبه أوروبا الجديدة المتطورة الى واخدة فى وشها وقازحة، قوم لما يجى محمد على المنبهر بالنموذج الأوروبى يقرر لمصر أنها تدخل لعصر النهضة والحداثة والتطوير قوم يعمل إيه؟ الراجل الحقيقة عمل اللى كلنا بينشف ريقنا فى قولته النهاردة، هو جابها من قاصرها وفهما بدرى بدرى، قالك بمنتهى البساطة اللى مبنعرفش نعمله نجيب اللى يعرف يعملهولنا، وفى نفس الوقت نبعت عيالنا عند اللى بيعرفوا يعلموهم إزاى يعرفوا ياسلام على اللطافة، وفعلا مكدبش خبر الراجل، بعت استقدم المهندسين والأطباء والمعلمين الأوروبيين عشان يجوا مصر يبنوها، وفى نفس الوقت بعد ولاد مصر فى البعثات العلمية يتعلموا ويتنوروا ويرجعوا مصر يفيدوها وينوروا طريقها، دى كانت سياسته".
وأضافت الإعلامية: "وفعلا نجح تماما فى كل اللى عمله، وده كان أهم مقاومات نهضة مصر وتطورها القياسى فى عصر محمد على وعصر الأسرة العلوية عموما، لأن ولاده وأحفاده أغلبهم انتهج نفس المنهج لدرجة أن مصر أصبحت أكثر تطورا وجمالا من أوروبا نفسها فى عهد حفيده إسماعيل باشا، ده التاريخ اللى بيقول زى مبؤلكم كده، لما جينا بقى نفكر فى تطوير مصر فى عصرنا الحديث، قولنا طب نفكر زى محمد على منبعت عبالنا يتعلموا مطرح ما الناس الحلوة المستحمية دى ما موجودة ويرجعوا زى مرجع رفاعة الطهطاوى ومصطفى باشا وطه حسين وغيرهم وغيرهم ينورونا ويفيدوا بلدهم".
واستطردت إسعاد قائلة: "الحقيقة فى كيانات اشتغلت على ده فعلا انطلاقا من فكرتهم وشعارهم فى إن تنمية الإنسان مهمتهم الأساسية، قوم مصر الخير راحت قايمة فعلا بإرسال البعثات التعليمية للخارج وركزوا جدا على التعليم الفنى، هنحتاج على فكرة نتكلم كتير أوى على التعليم الفنى ده بعد كده لأنه فعلا موضوع كبير محتاج يوم من أوله، المهم الناس اشتغلوا وفعلا ضمن برنامجهم الخاص بالتدريب من أجل التشغيل استهدفوا إرسال بعثات للخارج لأحسن أماكن ممكن يتعلم فيها الطلبة المصريين تعليم فنى متميز يكون السوق المصرى فعلا محتاجه، دى حاجة مهمة جدا، وخرج بالفعل من 2011 لحد النهاردة أعداد كبيرة جدا ولسة الناس مستهدفين عشان يتبعتوا أكتر وأكتر، تحية كبيرة بقى لكل اللى فكر وساهم أنه يستثمر فى الإنسان المصرى لأن ده أهم استثمار لمستقبل أى بلد".
وختمت قائلة: "لما تبنى بنى آدم حقيقى على أساس علمى وفنى صح أكبر مستفيد هيكون الوطن كله مش بس البنى آدم، والله العظيم صدقونى زى مبؤلكم كده".
