إسعاد يونس
وقالت إسعاد: "ناس كتير بيهون عليها تعب اليوم كله، عشان طول الوقت بيجى على بالها لحظة دخول البيت، لو فى الصيف هتفتكر رميتك على الكرسى اللى بتحبه وتفتح التكيف أو المروحة، وتلعب مع العيال وخلاص وبالك يرتاح، ولو فى الشتا هتفكر فى السرير الدافى والكلفتة تحت اللحاف أو البطانية، فكرة الرجوع للبيت بكل ما فيها من أمان وراحة بال بتهون عليك جزء كبير جدًا من تعب يومك".
وأضاف: "فما بالك بقى لما يكون بيتك هو مصدر التكدير فى حياتك، لما يتحول بيتك لواحد من مسببات الخطر والألم كمان، صعبة، مش كدة أحساس صعب أوى، وصعب حتى تتخيله يعنى ممكن من الخيال يتعبك، بس لازم نتخيله، لما نعرف أن نسبة كبيرة من البيوت المصرية والقرى والنجوع مبنية جدران بس، جدران يا دوب تحمى من عيون الناس، بس متحميش اللى ساكنين جواها، جدران من غير سقف، يا دوب متعرشة بجريد النخل ولا شوية قش ولا حبة حطب مفروشين بالطين والرمل، فتوقع العيشة تحتهم تبقى شكلها إيه".
وأوضحت: "فى الصيف لا تحميك من شمس ولا حرارة ولا رطوبة وفى الشتا لا تحمى من برد ولا مطر، لو الشمس طلعت تلقى البيت جهنم ولو المطر نزل تلقى البيت بحيرة طين، لو فى منطقة صحراوية تلقى عقارب وتعابين وحشرات وقوارض وزواحف على كل لون ولو فى منطقة جبلية مصيبتك أكبر مع السيول اللى ممكن تغرق البيت بحاله باللى فيه، مصر الخير حلال حملتهم الشتوية بيقدموا مساعدات كتيرة جدًا، فى تسقيف البيوت اللى من النوع ده، فى قرى بقى ونجوع مصر، خلال حملة الشتاء 2016/ 2017 قدموا الخدمة فى 11 محافظة".
وتابعت: "تم ترميم المنازل وتسقيفها وعمل دورات مياه صحية داخل المنازل، استهدفت مؤسسة مصر الخير تسقيف وترميم 1500 منزل متهالك، واستطاعت وقدرت توصل لـ 1604 منزل يلاقوا أهاليها الأمان بعد فترة كبيرة من المعناو، بيراعوا كمان وهما بيقوموا بعمليات التسقيف البعد المكانى والبيئى للمنطقة، لأن أغلب البيوت بيتم تسقيفها بالخشب والأسمنت، لكن فى منطقة زى أسوان وبسبب حرارة الجو العالية جدًا، ووجود كمان النمل الأبيض اللى بيتغذى على الخشب، تم عمل الأسقف بالحديد والصاج وعزله بالفوم الحرارى".
واستكملت: "حملة الشتا اللى بتقوم بها مصر للخير سنويًا، مع بداية فصل الشتا كل سنة، تضم كمان حملا لتوزيع البطاطين على الأسر المحتاجة، وحملات توزيع الملابس الشتوية، دور المؤسسة بيبدأ من حصر الحالات الأولى بالمساعدة وده بيتم عن طريق مسح شامل للمحافظة، بقراها ونجوعها وتحديد النازل والأسر المستهدفة، وبيتم تشكل لجنة إغاثة وطوارئ بتكون فى حالة انعقاد دائم طول فترة الشتا، وجاهزة للتدخل الفورى فى الحالات الصعبة والاستثنائية، زى ما حصل فى محافظات البحيرة والإسكندرية من كام سنة كدة لما اتعرضوا للسيول فى بداية فصل الشتا، تحقيق الحد الأدنى من الأمان فى البيوت هدف إنسانى نبيل يستحق أننا ندعمه بقوة كل القائمين عليه".
