إسعاد يونس
وقالت إسعاد: "عارفين حكاية الـ3 أسود، مش عارفينها، طب استنوا استنوا لما اتقمص دور أبلة فضيلة ولا بلاش خليها دور زوزو نبيل، قالك يا سيدى، حبوا يعملوا تجربة فى علم النفس، قوم جابوا 3 أسود حلوين كدة ودخلوهم أوضة مقفولة، وجابلهم غزالة حلوة مدبوحة وحطوها قصادهم، قوم واحد منهم اتشجع وقان مقرب بوزه من الغزالة، هب قاموا دالقين مياه سخنة على دماغ الاتنين التانيين وهكذا، كل ما واحد يقرب من الغزالة الاتنين التانيين يغرقوهم بمياه سخنة مولعة، مرة بعد مرةن بقى أى حد منهم يقرب من الغزالة أو حتى يفكر، التانيين يقوموا ماسكينه ضربينه، الأسود جعانة بس معنى أن حد يقرب أن التانيين هيتشوا بالمياه، شوية وراحوا ساحبين اسد من الـ3، ودخلوا مطرحه واحد جديد، طبيعى الغريب غشيم، قوم دخل عدل على الغزالة، والاتنين القدام عارفين اللى فيها، راحوا ملطشينله وعدموه العافية، وكل ما يقرب ياخد علقة حرامى فى مولد، شوية واتعلم خلاص، راحوا ساحبين كمان أسد من القدام، وكالعادة يخش غشيم ومتعافى على الغزالة يقوم الاتنين ضربينه وعدمينه العافية كل ما يقرب من الغزالة، لحد ما أتعلم أن اللى يفوت يموت، هوب راحوا ساحبين أخر أسد من القدام، ودخلوا واحد جديد، وطبق السيناريو حرفيًا، جوع لحد ما تكوت بس أوعى تقرب من الغزالة".
وأضافت: "أخدتوا بالكوا من حاجة؟ أن الـ3 أسود اللى موجودين دلوقتى مبيقربوش من الغزالة، وبيضربوا أى واحد يتجرأ يقرب رغم أن ولا واحد فيهم اتعرض لعقاب المياه السخنة، فهمتوا حاجة؟ طيب، ممكن نفهم أن الأسد أو دابة، متكرمتش بالعقل زى البنى آدم، برغم من كدة البنى آدم بيعمل زى الأسود كدة".
وأوضحت: "ناصبين قوائم وثوابت عمرهم ما فكروا فيها، عمرهم ما ركزا بيعملوها ليه، أهو كدة، طلعنا لاقينا أهالينا بيعموا كدة، فعملنا زيهم، طلعنا لاقين اللى قبلنا مكلبشين فى الميرى لحد الميرى ما بقى حلمنا، طلعنا لاقين اللى قبلين متشعبطين فى ديل جلابية القاهرة والمدن الكبرى لحد ما وقعت على دماغهم ومع ذلك طلعنا نموت ونكش فى جلدنا لو اضطرتنا الظروف نسكن ونشتغل بعيد عن القاهرة 20 كيلو بس، لاقينا اللى قبلنا بيدوروا على يا أما واسطة يا مين فاتح الدرج الشمال، فدورنا على واسطة أكبر، لاقين اللى قبلنا بيحفظوا مبيفهموش لا حفظنا ولا فهمنا، لاقيناهم مكبرين دماغم كبرنا كل حاجة لغاية لما قربوا يمسكونا برجلينا بفتلة لنطير من كتر التكبير".
وتابعت: "طب ما نقطة نظام بقى ونمسك حبة ثوابت كدة ونعيد تفكير فيها، مش لازم نكسرها يا سيدى، بس على الأقل نكسر تابوهاتها وناقشها ونفهمها ونحاول ندور على سببها، ونشوفوا منطقى ولا لا، والنبى وما هنخسر حاجة، لا بالعكس يمكن نكسب، حتى لو مكسبناش مكسب مادى، الأكيد هنكسب مكاسب معنوية كتير، احترام نفسك ودماغك وعقلك غير الراحة النفسية والتفكير بره الصندوق اللى صدى من كتر ما الكل بيتنفس ويفكر جواه، يادى القهرة".
