محمد ثروت : اشتغلت أمين مخازن وفتحت عربية كبدة جنب قهوة ورسبت 3 سنوات

قال الفنان محمد ثروت إن مخرج بين السما والأرض طلّع منه شخصية الدرامى وكشف عن تفاصيل دوره فى مسلسل بين السما والأرض، قائلاً: "ماندو اللى رشحنى لتمثيل الدور ده.. المخرج الشاطر هو اللى طلع فيا الحاجات دى".

وأضاف، خلال حواره مع الإعلامى يوسف الحسينى عبر برنامجه التاسعة المذاع على قناة الأولى المصرية:" ولو حد طلب منى من سنتين دور واحد مجنون فى الأسانسير مكنتش هعرف أعمله.. ويعتبر أول مخرج يعمل كده معايا ويطلع فيا الشخصية الدرامية.. وقرأت الرواية لنجيب محفوظ كويس وتطبعت على الشخصية كويس جدا".

وتابع: "الفنان الكبير أحمد بدير جيد جدا وفى التراجيدى جد جدا ومتمكن جدا ويخليك تعيط وممثل عبقرى جدا.. "رشش فشاش" دى شكلت ثقافة جيل بحالة.. وعنده ثبات انفعالى.. ودمه خفيف".

وتابع: "كنت عايش فعلا لحظات حقيقية بالمشاهد.. كنت بشيل جمل بضحك ونحط مكانها جمل تبقى درامية أكثر.. وبحب الكوميدى على طول ولو حد عنده ضغوط كبيرة اتفرج عليها بيفك.. وكنت برفض الأدوار الدرامية.. وعاوز الأدوار الكوميدية، ولكن لما أتعرض عليا دور درامى وافقت لأن الممثل بيعمل كل حاجة.. والنقلة دى بتثبت للناس اللى بيقولوا أننى مش بعمل أدوار درامية".

وعن مشهده فى فيلم كلمنى شكرا: "أول مشهد ليا وكنت من غير شنب.. وكنت بمثل قدام الفنان القديرة شويكار الله يرحمها.. وصبرى فواز أدانى قلمين.. وكل ما يشوفنى يقول لى حقك عليا".

وعن حياته فى الجامعة: "أتخرجت من كلية تجارة عين شمس بعد 7 سنين، وارتباطى بمنى كان بعد السنة الرابعة من الجامعة بسبب موقف حصل ما بينا.. وبعد سنة ونصف أخدت رقم تليفونها وكلمتها.. وخطبتها وقعت 3 سنين خاطب.. وعمى كان سكر وكان مقتنع بيا.. وكتبنا الكتاب سنتين وبعد كده أتجوزنا وجبنا سليم ولينا 13 سنة مع بعض، وفيه لحظات حلوة ووحشة عشناها مع بعض".

تابع :" اشتغلت أمين مخازن وفى سايبر، وفتحت عربية كبدة وسجق جنب قهوة.. وعرفونى حاجات كتير وشوفت أشخاص كتير وأتعرض عليا مواقف مضحكة كتير.. وده بيدى الممثل ذاكرة انفعالية حلوة".