على الحجار : بحب الرسم ..ومحمد الحلو: اصطدت سمكة قرش وزنها 200 كيلو

كشف الفنان محمد الحلو عن هوايته قائلا: "بحب صيد السمك، واصطدت قبل كده قرش وزنه اكتر من 200 كيلو، وده طريقة صيده قبل ما بنام بنحط سمكة كبيرة ونجرحهاش عشان تنزل دم ونسيبها ومن حظى انه جالى، وطلعته لوحدى فى 6 ساعات عشان خاطر يتكتب باسمى انا اللى اصطادته".

وحل المطربان على الحجار ومحمد الحلو، فى الجزء الثانى من برنامج "سهرانين" للإعلامى والنجم أمير كرارة، المذاع على قناة ON، وقال على الحجار : "أنا هوايتى الرسم وهى أصلا دراستى لانى خريج فنون جميلة، وانا لغاية دلوقتى برسم وحاليا بحضر لمعرض انا وبنتى لان هى كمان رسامة، وقاطعه الحلو، قائلا :" على الحجار رسمى مرة وانا صغير جننى لانه رسمنى بالظبط".

أغرب المواقف التى جمعت على الحجار ومحمد الحلو 

وتحدث الحجار والحلو عن المواقف التى جمعتهما، وقال على الحجار : "كان فى شخص باع ليا أغنية بلادى وباعها كمان لمحمد الحلو وبقيت الأغنية بتاعتنا احنا الاتنين فكنا بنغنيها سوا فى مكان بنختم بها اليوم، وحصل اختلاف بينا وقتها بسب أن كان فى مطرب تالت نفسه يغنيها معانا وكل يوم بيتاحيل عليا، وقعدت كتير اقنع محمد الحلو وهو كان رافض وقلتله مجاتش من يوم لغاية لما اقتنع وفعلا طلع غناها معانا وبوظ الأغنية ومحمد وقتها قالى هاضربكوا انتوا الاتنين".

وبسؤالهما عن أول تتر فى حياتهما، قال محمد الحلو: "أول تتر كان مسلسل اه يا زمن وكنت فى المعهد فى بدايتى"، وقال على الحجار: "أول تتر مسلسل ليا حقق شهرة كان مسلسل الأيام، وبرده المسلسل ده ساهم فى شهرة احمد زكى".

وتابع الحجار: "حصل مواقف كتير بينى وبين محمد الحلو 90% مينفعش تتحكى، وعلى سبيل المثال فى مرة كنا فى حفلة وانا وهو بس اللى من مصر وجيت اشيل المايك من الاستاند المايك طلع فى ايدى من غير السلك، وكنا على الهوا وكان المفروض كل واحد فينا هياخد 20 الف دولار وقتها كان رقم كبير ومخدناش حاجة".