آسر ياسين يوجه رسالة بالدموع إلى «مجدى»

آسر ياسين

وقال آسر ياسين، على صفحته الرسمية على موقع التواصل الاجتماعى فيسبوك: "مجدى كان المساعد بتاعى لأكتر من 14 سنة، قصته فيها كمية عِبَر حياتية غير طبيعية.. اشتغل كهربائى لمدة 30 سنة وبعد كده حصتله حادثة موت اتكتبله فيها عمر جديد".

وأضاف: "من هنا ابتدا يشتغل مساعد ليا بناءًا على نصيحة أبويا اللى رشحهولى عشان اخلاصه وأمانته.. عمره ما كان يتخيل انه يشتغل فى السيما ويقابل روبى ومنى زكى ومحمود حميدة!! ومش بس كده، ده كمان وقف قدام الكاميرا كذا مرة فى أدوار شرفية..كل الناس حبته لأنه يخش القلب على طول لطيبته وبساطته".

‎

وتابع آسر ياسين فى رسالته إلى مجدى: "كان يخاف عليا جداً بالذات فى مشاهد الاكشن..وكنا ساعات بنتقمص من بعض لما نخش فى حوارات عبثية عن الحياة وبعدها نقوم مهيفيين بأى كلام زى الصورة اللى فى البوست.. اللذيذ فى الموضوع انه كان ييجى يسألنى عن نصيحتى فى حاجات شخصية على رغم فرق السن.. مفيش طفل يشوفه غير ولازم يبتسم لا إرادياً بسبب وشه البشوش والطفولى".

واختتم آسر ياسين: "مجدى رحل عن عالمنا من 3 أسابيع ، ولحد النهاردة أنا ما اتكلمتش عنه. يمكن لأنى بتجنب ده أو أنى معتبره ما حصلش، مش عارف.. بس اللى عارفه كويس أوى أنه حقيقى واحشنى".