الراحل علاء ولى الدين
وعلق على الصورة قائلا: "ربنا يرحمك يا علاء.. زى النهاردة من 20 سنة اتوفى علاء ربنا يرحمه ويغفر له يا رب وبرغم إن فات 20 سنة على وفاته لكنه كان ومازال أقرب صديق ليا".
وتابع: "أول مرة اطلع عمرة كان معاه وإحنا رايحين الكعبة قاللى بص فى الأرض لغاية ما نوصل والكعبة تبقى باينة وأقوللك بص وادعى ويمكن الحكاية دى بقيت أعملها مع ـى حد يعمل عمرة لأول مرة وادعى لعلاء".
وأردف: "فى حياته كنت بشوف الخير اللى بيعمله مع ناس كتير واتعلم منه بشكل مباشر وغير مباشر.. علاقتنا كانت اكتر من إخوات ومن خلاله كنت بشوف باقى أصحابنا لأنه كان كريم جدا ومضياف جدا وفى بيته كنت بحس إنى فى بيتى وإن والدته الله يرحمها زى والدتى اللى اتوفت وأنا فى سن صغير وخالد اخوه الله يرحمه ومعتز ربنا يكرمه ويخليه لأولاده زى اخواتى وقت ماكنت أحس إنى متضايق أروحله اتكلم معاه وارتاح، ماكانش يعدى يوم إلا لما نتقابل أو نتكلم فى التليفون نعرف أخبار بعض".
واستطرد: "صادف إن يوم وفاته كان أول يوم عيد الأضحى وبعد ما وقف على الأضحية اتوفى وكنا على ميعاد يومها فى المسرح لعرض مسرحية لما بابا ينام اللى انتهت بوفاته".
واختتم: "ربنا يرحمك يا علاء ويصبر أهلك وأصحابك اللى أكيد مادام عرفوك عمرهم ما هينسوك".
