رامى جمال
وكتب رامى عبر حسابه الشخصى على موقع فيسبوك: الحمد لله أولا وأخيرا.. أنا عاوز أقول كلام كتير عن اللى شوفته منكم.. كلمة شكرا قليلة على مشاعركم وعلى رقى كلامكم وعلى الوقت اللى ضيعتوه علشان تحسنوا الصورة المظلمة اللى كانت فى عينى.
وأضاف: أنا بقيت شايف الابتلاء دة هدية من ربنا علشان أشوف الحب ده.. والله دموعى مبتقفش وأنا بشوف كلامكم.. أوعو تبخلوا على أى حد بدعم نفسى زى اللى دعمتونى بيه.
وتابع كلامه: إحساس الحب بينور الدنيا بيرجع الروح والأمل اللى أنتم عملتوه ميتقدرش.. ثانيا عاوز أشكر زملائى الفنانين على كل كلمة حلوة وكل دعم شفته، هى دى الروح اللى نفسى تفضل موجودة مش بس بعد المرض ولا الوفاة.. الكلام الحلو قولوه على طول.. ليا ولغيرى بيفرق جدا.. الحب بيغير الضلمة لنور، مضيفا: ثالثا لكل القنوات اللى بتحاول تتواصل معايا من إمبارح علشان تطمن عليا بشكركم جدا بس أنا كتبت البوست ده علشان أنهى حمل على قلبى مش علشان أبقى تريند.. بشكركم طبعا بس أتمنى لما تقرروا تستضيفونى يبقى على عمل فنى مش مرض.. مقدر شغلكم طبعا بس أنا مش قابل فكرة مريض.. أنا الحمد لله اتأكدت بكلام الناس أنى مش خايف ومش هترفض.. فبلاش أى حاجة تتفهم غلط شكرا على اهتمامكم ومقدره، وبشوفكم فى لقاءات فنية بعد نزول ألبومى ده أفضل نفسيا كتير ليا.
وختم كلامه: مفيش مانع ساعتها نتكلم عن أنى إزاى اتعايشت بيه وهتعايش بيه لو ليا عمر الحمد لله على الابتلاء.. الحمد لله على حبكم ودعمكم ده دين هعيش بيه خلصتونى من سجن كنت عايش بيه كنت بصحى قبل ما أغسل وشى أعد البقع وأشوفها زادت ولا لا.. النهاردة صحيت نزلت وحبيت المحنة اللى ورتنى قلوبكم وجمالها شكرا من قلب قلبى.
