فيديو .. حمادة هلال : اشتغلت سباك ونقاش وكبابجى وأول أجر كان 5 جنيهات

كشف النجم حمادة هلال، تفاصيل رحلة كفاحه، قائلا: "أنا مريت بمراحل صعبة كتير، لأن والدى ربنا يخليه ليا ويطول فى عمره كان طول الوقت يقول إن فترة الإجازة مينفعش نقضيها لعب، فيقولى اشتغل ولكن مكنتش بعمّر كتير فى الشغل، فمثلا اشتغلت نقاش وسباك وأكتر شغلانة عمرت فيها كانت في محل كباب وكفتة".

وتابع حمادة هلال خلال لقاءه في برنامج "واحد من الناس" تقديم الإعلامى عمرو الليثى على قناة الحياة: "أنا اشتغلت فى السباكة كنت بكسر المطبخ والحمام بالأجنة والشاكوش لأن مكنش ينفع أكون صنايعى، ولكن أكتر شغلانة عمرت فيها كنت بنضف " أسياخ الكفتة"، وكان المكان ده وشه حلو عليا لأنى وأنا شغال كنت بغنى وواحد قالى فرح بنتى بكرة تعالى غنى، ولكن اليوم ده كان نكبة عليا برده لأنى غنيت في وقت متأخر من ورا والدى يعرف وكانت ايده تقيلة بس كان عنده حق فعلا " .

وأضاف قائلا:"، أنا عرفت أن صوتى حلو وقت المدرسة وفترة شغلى اللى اشتغلت في أفراح منطقتى، وأول أجر ليا  الأفراح كان 5 جنيه وجيبت طرح لأمى بيها، وكان عندى طموح أخرج بره المنطقة، ولكن والدى طلب منى أبتعد عن الغناء وبعد فترة قالى هاوديك شركات إنتاج في محاولة لمساعدتى".

وتابع قائلا: "روحنا لشركة انتاج بس كانوا بيخافوا أن الصوت يتغير لما أكبر في السن شوية فلما سألته هتعملى شريط قالى لا وقالى أطلع "بره" والكلمة دى سمعتها كتير أوى، والموضوع ده سد نفسى، وبعدها قابلت حسن اش اش في شارع محمد على لأنى كنت بغنى هناك وهو اللى قالى هاوديك لحميد الشاعرى وفعلا أخدنى وسمع صوتى وفرحوا بيا جدا، وكانت البداية بقى".