البث المباشر الراديو 9090
إسعاد يونس
قالت الإعلامية إسعاد يونس فى برنامجها "زى مبؤلك كده" على الراديو 9090: كل سنة وأنت طيب.. كلمة ممكن تسمعها فى أى مصلحة حكومية أو حتى محل بتشترى منه مستلزمات البيت، أو وأنت فى المناصرة بتشترى عفش قفص الزوجية، قصد عش الزوجية.

وأضافت: واللى جاية دى أوعى تستغربها، تسمعها وأنت بتستخرج شهادة وفاة، وهتسمعها كل سنة وأنت طيب بس فى ديلها البقاء لله، مش عارف إزاى، بس بتحصل، والهى بتحصل.

خلينا ناخد الحدوتة بطريقة أخونا بتوع السيما، تخيل معايا كدة نهار داخلى، داخلى فى أى حتة أو مصلحة أو محل، داخل أنت بابتسامة مقاس 45، ومادد إيدك بالورق بتاعك، ولا كأنك بتقدم ورق اعتمادك كسفير للنوايا الحسنة، يقوم الواحد من دول بعد ما يبوص فى الورق بتاعك وهيبدأ يبوص ويشتغل فيه وبعد ما يكون عدل النضارة 100 مرة ولا أكون بيعدل ميزان الكون، يقوم قايلك وهو على وشه ابتسامة مقاسها أكبر من ابتسامتك ويقولك كل سنة وأنت طيب، طبيعى ترد وتقول وأنت طيب، أوعى تقوله كدة بلاش صدقنى، ساعتها ورقك هيحتاج يتختم من كوكب المريخ، أو تجيب ريش ديك شركسى مواليد التسعينات، وساعتها مش هتلوم غير نفسك، يبقى الطبيعى تقولوا إيه وأنت طيب يقوم هو ضاحك كدة بعد ما يلاقى البعيد اللى هو حضرتك معندوش نظر ويقوم قايلك كل سنو وأنت طيب، ولو حضرتك أصريت على غبائك، هيقوم هو مطوع بصبر مابيخلصش وموسع الابتسامة وقايل فين الحلاوة بتاعتى ويقوم عامل حركة سينمائية كدة ويوقم فاتح الدرج بطريقة كدة كأنه فتح يا عم فتح شوف مين بيكلمك، والهى زى مابقولكوا كدة.

ودى اللحظة اللى الابتسامات ما بينكوا بتقف لمدة ثوانى، ثوانى طويلة جدًا، حاجة كدة زى الليل وآخره، اللى كلنا بنسمع عنه، واللى هيحصل بعد كدة على حسب مفهوميتك بقى وذوقك وكل سنة وأنت طيب بقى.

كل سنة وأنت طيب بتاعت الموظفين أو أى حد رايح تخلص منه مصلحة قديمة قدم التاريخ، قاريت فى كتاب الأوائل فى منه نسخة يتيمة لاقيتها فى ظروف غامضة، الكتاب ده بيقول أن أول واحد قال كل سنة وأنت طيب الملزقة السقيلة دى كان موظف فرعونى مسؤول عن مخازن الكوسة الفرعونية، اللى كانت أكبر كتير من دلوقتى، يعنى بيقولوا أن حبة الكوسة الواحدة كانت فيها بركة كدة، وكانت ممكن تعشى عيلة بحالها، المهم الموظف الفرعونى ده كان لما يجى حد ياخد كوسة كان يسأله لمين لو قاله للقصر أو لحد من الفراعنة الصغيرين كان يقوله كوسة طيبة يعنى كوسة حلوة بالهنا والشفا، مع السلامة يا حج، لكن لو واحد عادى هو اللى واخد الكوسة كان الموظف بيقوله كوسة ولا أتة، طبعًا المواطن من دول كان يقوله أتة، ويقوم غمزه باللى فى النصيب عشان يخلع بالكوسة اللى كانت ممنوعة على عامة الشعب فى زمن الفراعنة، الغريب بقى أن الموظف الفرعونى كان اسمة أكر مى، وفى أقول أخرى كانت واحدة كان اسمها أكرامية زى ما بقولك كدة أكرامية.

 

تابعوا مبتدا على جوجل نيوز


اقرأ ايضاً