إسعاد يونس
وأضافت: عشريين ونحب نتلم كده ويبقى نفسنا فى بوء بعض، حتى تلاقينا المساحات الخاصة دايما دى منتهكة كده، يعنى ما ينفعش ندى لكل بنى آدم ربع متر حوالين منه يتحرك فيهم من غير ما يخبط فى مناخير حد تانى، وده السبب الحقيقى إن ماعندناش ثقافة "الطابور" آه والله ما هى الطوابير ثقافة.
فكرة الناس اللى ورا بعضها وكل واحد سايب يجى 10 سم بحالهم بينه وبين اللى قدامه واللى وراه علشان تخلص أى حاجة، دى ثقافة حقيقية والله زى ما بؤلكوا كده بس مابنلاقيهاش عندنا، وإن حصل ولاقيناها، فبنلاقيها واكلها البارومة ومعدى قطر مرتين رايح جاى فوقيها.
فتلاقى الطابور، إن لاقيته يعنى، تلاقيه واخد شكل التعبان أكتر من شكل الخط، ومش لأنه ملتوى أو لأنه لافف على بعضه، لأن دى ماهياش أكبر مشاكل الطابور، لكن هتلاقيه تعبان له راس على شكل عبارة عن حنكيشة بشر متزاحمين، وبعدينه له ديل عبارة عن بشر برضو ورا بعض، فى النص ينتاب الديل ده حبة تورمات كده، ودول عبارة عن بشر تانيين مُصرين يمارسوا دروب الحداقة والطرمخة فى الدخول فى دور مش بتاعهم، فهمتوا بقى حاجة؟ زى ما بؤلكوا كده.
المهم، إن ثقافة الطابور دى فى العادى جت كإبداع إنسانى لتسهيل مهام الحياة فى البلاد الزحمة، واللى مطلوب فيها الحصول على خدمات بيقدمها عدد محدود من البشر، يعنى ناس كتير بيخدمهم ناس أقل، فعلشان تنجز يقفوا طابور، قوم الغلبان بقى اللى بيقدم الخدمة يعرف يتعامل مع الناس نفر نفر، من غير ما يتشتت ويروح ويجى، ويقدم الخدمة أسرع.
كمان معمولة علشان أكبر عدد من الناس، يدخل مكان واحد مساحته صغيرة، وله بوابات، يعنى زى المواصلات والمحلات الزحمة، أو حتى الأسانسيرات، ففكرة إننا نحدف نفسنا جوه الأماكن دى زغط كده زى أكل البط، مش بس ممكن تسيب مشاكل، ده ممكن كمان تسبب مصايب وكوارث لولا ستر ربنا لوحده.
كام مصايب حصلت بسبب حشرتنا فى أماكن ماتسعناش، وكام مصالح مابتنقضيش علشان مُصريين كلنا نتكلم فى نفس النفس مع اللى بيقدم الخدمة أو اللى بيخلص المصلحة.
ماحدش ينكر إن الطابور حاجة مملة، الوقفة بقى والانتظار وجايز يبقى فى حر أو برد أو تعب أو زهق، فى مؤسسات دلوقتى اعتمدت على فكرة الرقم اللى تاخده وتروح تقعد تستريح كده أو تعمل أى حاجة يعنى لحد ما يجى دورك ويبقوا يندهولك، ودى حاجة حلوة الصراحة، بس برضو ماهياش متوفرة فى كل مكان، ومضطرين نتعامل مع الطابور التقليدى، وإحنا عندنا مشكلة مع الطابور التقليدى.
هل ده له علاقة بأزمة تاريخية مع الطوابير؟ هل مثلا وقفتنا فى طوابير المدرسة زمان كانت نوع من التكدير الإنسانى لدرجة تكريهنا فى كل أشكال الطوابير؟ وتعمدنا إفسادها؟ وبذل كل مرتخص وغالى فى سبيل الهدف السامى ده؟ جايز ومين عارف.
هل ذكريات طوابير الجمعية وطوابير العيش وطوابير الغاز وطوابير البنزين اللى كانت بتستمربالساعات والأيام خلت الطابور بالنسبة لنا شبه وحوش أساطير أمنا الغولة وأبو رجل مسلوخة والنداهة، وبقت الفكرة بتعملنا فوبيا، فبقينا نخوف بيها العيال على طريقة لو ماكلتش البامية هجيبلك الطابور ياكل عمرك ويمتص أحلامك؟ جايز برضو.
شوف.. هو فى سبب محتاج بحث وتمحيص وحد كبير كده وراسى يقعد يقولنا ليه فى تار بايت بينا وبين الطوابير رغم أنها حاجة مهمة جدا، كانت مملة وسخيفة إلا أنه فى الأخر سلوك آدمى بيوفر وقت ويدى كل واحد حقه ويحمى أرواح الناس، ولا أنت إيه رأيك؟؟